மன்னார் – மதவாச்சி பிரதான வீதியில், உயிலங்குளம் – நொச்சிக்குளம் பகுதியில் இன்று காலை துப்பாக்கி சூட்டுச் சம்பவமொன்று பதிவாகியுள்ளது.
நொச்சிக்குளம் பகுதியை சேர்ந்த விவசாயி ஒருவரை இலக்குவைத்து துப்பாக்கி பிரயோகம் முன்னெடுக்கப்பட்ட நிலையில், குறித்த கிராம மக்கள் வீதியை மறித்து போராட்டத்தில் ஈடுபட்டனர்.
மோட்டார் சைக்கிளில் வந்த இரண்டு மர்ம நபர்கள் ரி-56 ரக துப்பாக்கி மூலம் விவசாயி மீது சுட்ட போதும் அவர் மயிரிழையில் உயிர் தப்பியதாக தெரிவிக்கப்படுகின்றது. கடந்த சில காலமாக நொச்சிக்குளம் கிராமத்து மக்கள் மீது ஒரு குழுவினர் தாக்குதல் நடத்தி வருவதாகவும் இதுவரையில் மூவர் உயிரிழந்துள்ளதாக கிராம மக்கள் தெரிவித்துள்ளனர்.
குறித்த துப்பாக்கிச் சூட்டு சம்பவம் தொடர்பாக மன்னார் மற்றும் உயிலங்குளம் பொலிஸார் தீவிர விசாரணைகளை முன்னெடுத்து வருகின்றனர். துப்பாக்கிச் சூட்டு சம்பவத்தை தொடர்ந்து இன்று காலை முதல் மன்னார் பிரதான பாலம் ஊடாக மன்னார் நகருக்கு வருகை தரும் அனைத்து வாகனங்களும், பொலிஸாரினால் விசேட சோதனைக்கு உட்படுத்தப்பட்டமை குறிப்பிடத்தக்கது.
