கச்சத்தீவு கடற்பரப்பில் இலங்கை கடற்படையினரால் தாக்கப்பட்டதாக இராமேஸ்வரம் கடற்றொழிலாளர்கள் முன்வைத்த குற்றச்சாட்டை இலங்கை கடற்படை ஊடகப் பேச்சாளர் கெப்டன் கயான் விக்ரமசூரிய மறுத்துள்ளார்.
கச்சத்தீவுக்கு கடற்பரப்பில் இலங்கை கடற்படையினர் தாக்கியதில் நான்கு இராமேஸ்வர கடற்றொழிலாளர்கள் காயமடைந்துள்ளதாக நேற்று இந்திய ஊடகங்கள் செய்தி வெளியிட்டிருந்தன.
இந்நிலையில் இந்திய மீனவர்கள் தாக்கப்பட்டதாக கூறப்படும் சம்பவம் தொடர்பாக கடற்படை ஊடகப் பேச்சாளர் கருத்து வெளியிட்டபோதே இவ்வாறு மறுத்துள்ளார்.
கடற்படையினரால் தாக்குதல் நடத்தப்பட்டதாகக் கூறப்படும் கடற்பகுதி தொடர்பான ரேடார் தகவல்கள் வழங்கப்படுமாயின் அதனை உறுதிப்படுத்த முடியும் என்றும் கடற்படை ஊடகப் பேச்சாளர், கெப்டன் கயான் விக்ரமசூரிய மேலும் தெரிவித்துள்ளார்.
பெரும்பாலான சந்தர்ப்பங்களில் அத்துமீறி கடற்றொழிலில் ஈடுபடுகின்ற இந்திய கடற்றொழிலாளர்களை மீண்டும் திருப்பி அனுப்புவதற்கு நடவடிக்கை எடுக்கப்படும் என்றும் ஆனால் அதனை மீறிச் செயற்படுபவர்களாயின் கைது செய்வதாகவும் இலங்கை கடற்படை ஊடகப் பேச்சாளர் குறிப்பிட்டார்.
எவ்வாறாயினும், கடற்றொழிலாளர்கள் மீது தாக்குதல் நடத்தும் அதிகாரம் கடற்படையினருக்கு இல்லை என அவர் தெரிவித்துள்ளார்.
