இந்தியாவில் மக்களவைத் தேர்தலில் இறுதி வாக்குப்பதிவு விகிதத்தில் குளறுபடி செய்து பா.ஜ.க 79 தொகுதிகளில் வெற்றி பெற்றதாக காங்கிரஸ் கட்சி குற்றஞ்சாட்டியுள்ளது.
அதன்படி, நடைபெற்று முடிந்த மக்களவைத் தேர்தலில் இறுதி வாக்குப்பதிவு எண்ணிக்கையில் கணிசமான வித்தியாசம் இருப்பது காங்கிரஸ் கட்சியின் மூத்த தலைவர் சந்தீப் தீக்ஷித் தெரிவித்துள்ளார்.
அத்துடன், தலைமைத் தேர்தல் ஆணைக்குழு மக்களவைத் தேர்தல் வாக்குப்பதிவு சதவீதத்தில் முதலில் கூறியதற்கும், பின்னர் அளித்த இறுதி புள்ளிவிபரங்களுக்கும் இடையே சராசரியாக 4.7 சதவீதம் வித்தியாசம் உள்ளதாகவும், இது தேசிய அளவில் சுமார் 5 கோடி வாக்குகள் எனவும் வோட் பார் டெமாக்ரசி என்ற அமைப்பின் ஆய்வறிக்கையில் தெரியவந்துள்ளதாக அவர் குறிப்பிட்டுள்ளார்.
அதற்கமைய, ஒடிஸா, ஆந்திர பிரதேசம் உள்ளிட்ட மாநிலங்களில் 12.5 சதவீதம் வரை வித்தியாசம் உள்ளதாகவும் இலட்சத்தீவு உள்ளிட்ட சில இடங்களில் 25 சதவீதம் வரையிலும் வித்தியாசம் இருப்பதாகவும் அவர் சுட்டிக்காட்டியுள்ளார்.
வோட் ஃபார் டெமாக்ரசி என்ற அமைப்பு பா.ஜ.க வெற்றி பெற்ற 79 தொகுதிகளை குறிப்பாக அடையாளம் கண்டுள்ளதாகவும் அவர் குறிப்பிட்டுள்ளார்.
மக்களவைத் தேர்தலில் முதல் கட்டத்தின் இறுதி புள்ளிவிபரங்களை வெளியிட தேர்தல் ஆணைக்குழு 11 நாட்கள் எடுத்துக் கொண்டதாகவும் 2 ஆவது கட்டத்திற்கு 6 நாட்கள் மற்றும் அடுத்தடுத்த கட்டங்களுக்கு 4 முதல் 5 நாட்கள் எடுத்துக்கொண்டதுடன், இது தேர்தல் ஆணைக்குழுவின் நம்பகத்தன்மையில் சந்தேகத்தை ஏற்படுத்தியுள்ளதாகவும் அவர் வலியுறுத்தியுள்ளார்.
