லெபனானில் உள்ள இலங்கையர்களுக்கு இலங்கை வெளிநாட்டு வேலைவாய்ப்புப் பணியகத்தில் பதிவு செய்வதற்கு விசேட கால அவகாசம் வழங்கப்பட்டுள்ளது.
லெபனானின் தற்போதைய இராணுவ நிலைமையை கருத்தில் கொண்டு இந்த முடிவு எடுக்கப்பட்டுள்ளது.
இலங்கையின் வெளிநாட்டு வேலைவாய்ப்புப் பணியகத்தில் பதிவு செய்து, லெபனானுக்கு வந்த பின்னர் அதே பதிவை புதுப்பிக்காமல் நீண்ட காலமாக பணியில் இருக்கும் இலங்கை பணியாளர்களுக்கு இந்த சலுகை காலம் வழங்கப்பட்டுள்ளது.
இது 2024 ஒக்டோபர் 08 முதல் 2025 ஜனவரி 08 வரை அதாவது 03 மாத காலத்திற்கு நடைமுறையில் இருக்கும்.
தூதரகத்திற்கு வருகை தருவதன் மூலமாக பதிவுகளை விரைவாக மேற்கொள்ள முடியும் என இலங்கை வெளிநாட்டு வேலைவாய்ப்பு பணியகம் தெரிவிக்கின்றது.
அதன்படி, இலங்கை வெளிநாட்டு வேலைவாய்ப்புப் பணியகத்தில் பதிவு செய்ய வரும்போது பின்வரும் ஆவணங்களை தூதரக அலுவலகத்திற்கு கொண்டு வருமாறு தெரிவிக்கப்பட்டுள்ளது.
- செல்லுபடியாகும் விசா மற்றும் செல்லுபடியாகும் கடவுச்சீட்டு
- தற்போதைய பணியிடத்துடன் தொடர்புடைய வேலைவாய்ப்பு ஒப்பந்தம் அல்லது வேலை வாய்ப்பு கடிதம்
இந்த பதிவு செயல்முறைக்கு 62 அமெரிக்க டொலர்கள் அரசாங்கக் கட்டணமாக வசூலிக்கப்படுகிறது.
இதன்படி, இந்தப் போர்ச் சூழ்நிலையில் வழங்கப்பட்ட விசேட நிவாரணக் காலம், பணியகத்தின் பதிவைப் பெற்று, பதிவு செய்யப்பட்ட புலம்பெயர்ந்தோர் நலன்புரி மற்றும் காப்புறுதிப் பலன்களைப் பெற்றுக் கொள்வதன் மூலம் வேலையின் பாதுகாப்பை உறுதிப்படுத்துவதற்கான சிறந்த சந்தர்ப்பம் எனவும் இலங்கை வெளிநாட்டு வேலை வாய்ப்புப் பணியகம் தெரிவித்துள்ளது.
தூதரகம் இதற்காக விசேடமாக 13.10.2024 ஞாயிற்றுக்கிழமை காலை 9.00 மணி முதல் பிற்பகல் 2.00 மணி வரை திறந்திருக்கும்.
அன்றைய தினம் முதல் அடுத்த 03 மாதங்களுக்கு வாரத்தின் ஐந்து நாட்களில் ஒருமுறை இந்த சேவை வழங்கப்படும்.
மேலும் விபரங்களுக்கு:
1.00961-81685186/00961-81915603
2. 00961-79125589
என்ற இலக்கங்களுடன் தொடர்பு கொள்ளலாம்.
