மெல்போர்னில் நடைபெற்ற இந்தியாவுக்கு எதிரான நான்காவது டெஸ்ட் போட்டியின் ஐந்தாம் நாளான இன்று (30) அவுஸ்திரேலிய அணி 184 ஓட்டங்களினால் அபார வெற்றி பெற்றது.
இந்த வெற்றியின் மூலம் அவுஸ்திரேலியா ஐந்து போட்டிகள் கொண்ட டெஸ்ட் தொடரில் 2-1 என்ற கணக்கில் முன்னிலை பெற்றது.
இரு அணிகளுக்கும் இடையிலான பார்டர் – கவாஸ்கர் கிண்ணத் தொடரின் 4 ஆவது டெஸ்ட் போட்டி கடந்த 26 ஆம் திகதி தொடங்கியது.
பாக்சிங் டே என்ற பெயரில் அழைக்கப்படும் இந்த டெஸ்ட்டில் முதலில் துடுப்பாட்டம் செய்த அவுஸ்திரேலியா முதல் இன்னிங்சில் 474 ஓட்டங்களை குவித்தது.
இதையடுத்து களமிறங்கிய இந்திய அணி முதல் இன்னிங்சில் 369 ஓட்டங்களுக்குள் சகல விக்கெட்டுகளையும் இழந்தது.
105 ஓட்டங்கள் முன்னிலையுடன் 2 ஆவது இன்னிங்சை ஆடிய அவுஸ்திரேலியா 234 ஓட்டங்களுக்குள் சகல விக்கெட்டுகளையும் இழந்தது.
இதன் மூலம் பாக்சிங் டே டெஸ்ட்டில் வெற்றிபெற இந்தியாவுக்கு 340 ஓட்டங்கள் இலக்காக நிர்ணயிக்கப்பட்டது.
போட்டியின் இறுதி நாளான இன்று 340 ஓட்டங்கள் எடுத்தால் வெற்றி என்ற இலக்குடன் இந்தியா களமிறங்கியது.
எனினும், அவுஸ்திரேலிய அணியின் அதிரடி பந்து வீச்சை தாக்குப்பிடிக்க முடியாமல் இந்தியா அடுத்தடுத்து விக்கெட்டுகளை இழந்து தடுமாறியது.
முன்னணி வீரர்களான ரோகித் சர்மா 9 ஓட்டத்துடனும், கே.எல். ராகுல் ஓட்டம் எதுவும் எடுக்காமலும் (0 ரன்), கோலி 5 ஓட்டங்களுடனும் அடுத்தடுத்து ஆட்டமிழந்து ஏமாற்றம் அளித்தனர்.
சிறிது நேரம் தாக்குப்பிடித்து ஆடிய ரிஷப் பண்ட் 30 ஓட்டங்களில் ஆட்டமிழந்தார்.
இதையடுத்து களம் இறங்கிய ஜடேஜா 2 ஓட்டத்துடனும், நிதிஷ் குமார் ஒரு ஓட்டத்துடனும், ஆகாஷ் தீப் 7 ஓட்டத்துடனும் ஆட்டமிழந்து வெளியேறினர்.
மறுபுறம் நிதானமாக ஆடி வந்த ஜெய்ஸ்வால் 84 ஓட்டங்களில் ஆட்டமிழந்தார்.
இறுதியில் இந்தியா 79.1 ஓவர்களில் அனைத்து விக்கெட்டையும் இழந்து 155 ஓட்டங்களுக்குள் சுருண்டது.
இதன் மூலம் அவுஸ்திரேலியா 184 ஓட்டங்கள் வித்தியாசத்தில் அபார வெற்றி பெற்றது.
இந்த வெற்றியின் மூலம் 5 போட்டிகள் கொண்ட டெஸ்ட் தொடரில் 2-1 என அவுஸ்திரேலியா முன்னிலையில் உள்ளது.
இரு அணிகளுக்கும் இடையிலான கடைசி டெஸ்ட் போட்டி எதிர்வரும் ஜனவரி 03 ஆம் திகதி சிட்னியில் தொடங்குகிறது.
