இங்கிலாந்து மற்றும் வேல்ஸில் உள்ள காவல்துறை அமைப்பை மாற்றியமைக்க திட்டம்!

இங்கிலாந்து மற்றும் வேல்ஸில் உள்ள காவல்துறை அமைப்பை முழுமையாக மாற்றியமைக்க அந்நாட்டு அரசாங்கம் திட்டமிட்டுள்ளது.

தற்போதைய 43 தனித்தனி படைகளின் எண்ணிக்கையை கணிசமாகக் குறைத்து, அவற்றை ஒருங்கிணைந்த பெரிய அமைப்புகளாக மாற்ற இந்தப் புதிய வரைவு அறிக்கை முன்மொழிகிறது.

இதன் மூலம் குற்றப்பிரிவு மற்றும் கணினித் தரவுகளைப் பகிர்வதில் உள்ள சிக்கல்களைக் களைந்து, நிர்வாகத் திறனை மேம்படுத்த இலக்கு நிர்ணயிக்கப்பட்டுள்ளது.

இதேவேளை, சாதாரணத் திருட்டுகள் போன்ற அன்றாடப் பிரச்சனைகளைக் கவனிக்க உள்ளூர் காவல் பிரிவுகள் தனியாக உருவாக்கப்படும்.

இருப்பினும், இந்தத் திட்டத்திற்கான நிதி ஆதாரம் மற்றும் அதன் வெற்றி வாய்ப்புகள் குறித்து எதிர்க்கட்சிகள் கடும் விமர்சனங்களை முன்வைக்கின்றன.

இந்த அதிரடி மாற்றங்கள் குறித்த விரிவான விவரங்கள் எதிர் வரும் திங்கட்கிழமை அதிகாரப்பூர்வமாக வெளியிடப்பட உள்ளன.