ஏவுதளத்தில் வெடித்துச் சிதறிய ஜெஃப் பெசோஸின் ‘நியூ கிளென்’ விண்கலம்!

அமேசான் நிறுவனர் ஜெஃப் பெசோஸின் விண்வெளி ஆராய்ச்சி நிறுவனமான ‘புளூ ஒரிஜின்’ (Blue Origin) தயாரித்த, மனிதர்கள் இல்லாத ‘நியூ கிளென்’ (New Glenn) ராக்கெட், ஏவுதளத்தில் சோதனை ஓட்டத்தின் போது வெடித்துச் சிதறியுள்ளது.

எலான் மஸ்க்கின் ‘ஸ்பேஸ் எக்ஸ்’ நிறுவனத்துடனான போட்டியில் முன்னிலை பெற முயன்ற ஜெஃப் பெசோஸுக்கு இது ஒரு மாபெரும் பின்னடைவாகப் பார்க்கப்படுகிறது.

புளோரிடா ஏவுதளத்திலிருந்து நேரடி ஒளிபரப்பு செய்யும் ‘நாசாஸ்பேஸ்பிளைட்’ (NASASpaceflight) என்ற யூடியூப் தளம் வெளியிட்ட காணொளியில், கிழக்கு நேரப்படி நேற்று இரவு இரவு 9:00 மணியளவில் நியூ கிளென் ராக்கெட் திடீரென தீப்பற்றி எரிந்து, நெருப்புப் பந்தாக வானை நோக்கி வெடித்துச் சிதறியது காட்சியளிக்கிறது.

புளூ ஒரிஜின் நிறுவனம் தமது எக்ஸ் (X) தளத்தில்,

“இன்றைய ஹாட்-ஃபயர் சோதனையின் போது ஒரு அசாதாரண நிலை ஏற்பட்டது.

அதிர்ஷ்டவசமாக ஏவுதள ஊழியர்கள் அனைவரும் பாதுகாப்பாக உள்ளனர்.

இதுகுறித்த முழு விபரங்களையும் ஆராய்ந்த பின்னர் கூடுதல் தகவல்களை வெளியிடுவோம்.”என தெரிவித்துள்ளது.

இந்த விபத்து குறித்து கருத்து தெரிவித்துள்ள ஜெஃப் பெசோஸ், “விபத்திற்கான மூலக் காரணத்தைக் கண்டறிய இன்னும் சில காலம் எடுக்கும்.

இது மிகவும் கடினமான ஒரு நாள், எனினும் எதனை மீண்டும் கட்டியெழுப்ப வேண்டுமோ அதனைச் செய்து, மீண்டும் பறக்கத் தொடங்குவோம். அதற்கான மதிப்பு இதற்கு உண்டு” என்று குறிப்பிட்டுள்ளார்.

இந்த வாரம் , நாசா (NASA) அமைப்பு தனது ‘ஆர்ட்டெமிஸ்’ (Artemis) நிலவு ஆய்வுத் திட்டத்தின் கீழ், நிலவின் மேற்பரப்பிற்கு ரோவர்களை (Rovers) கொண்டு செல்வதற்காகப் புளூ ஒரிஜின் நிறுவனத்திற்கு 188 மில்லியன் டாலர் மதிப்பிலான ஒப்பந்தத்தை வழங்கியிருந்தது.

நாசாவின் புதிய நிர்வாகி ஜாரெட் ஐசக்மேன் (Jared Isaacman) இது குறித்துத் தெரிவிக்கையில்:

“விண்வெளிப் பயணம் என்பது மிகவும் சவாலானது.

நாசா இந்த விபத்து குறித்து முழுமையாக ஆராய்ந்து வருகிறது. இந்த விபத்தினால் ஆர்ட்டெமிஸ் மற்றும் நிலவு தள (Moon Base) திட்டங்களுக்கு ஏதேனும் பாதிப்புகள் ஏற்படுமா என்பது குறித்து ஆராய்ந்து தகவல்களை வெளியிடுவோம்.” என தெரிவித்துள்ளது.

ஸ்பேஸ் எக்ஸ் நிறுவனத்தின் ஃபால்கன் (Falcon) மற்றும் ஸ்டார்ஷிப் (Starship) ராக்கெட்டுகளுக்குப் போட்டியாக, மீண்டும் பயன்படுத்தக்கூடிய முதலாவது அடுக்குடன் (Reusable first stage) கூடிய 29 மாடிக் கட்டிட உயரத்தைக் கொண்ட இந்த நியூ கிளென் ராக்கெட்டை உருவாக்குவதற்குப் புளூ ஒரிஜின் நிறுவனம் கடந்த 10 வருடங்களாகப் பில்லியன் கணக்கான டாலர்களைச் செலவிட்டுள்ளது.

இதேவேளை, அமெரிக்க மத்திய விமான போக்குவரத்து நிர்வாகம் (FAA) இந்த விபத்து தங்களது கட்டுப்பாட்டு எல்லைக்கு அப்பாற்பட்டது என்றும், இதனால் அப்பகுதியில் உள்ள வான் போக்குவரத்துகளுக்கு எவ்வித பாதிப்பும் ஏற்படவில்லை என்றும் உறுதிப்படுத்தியுள்ளது.