கடந்த வெசாக் பௌர்ணமி தினத்தன்று மீகொடை பகுதியில் அமைக்கப்பட்டிருந்த தன்சல் வரிசையில் நின்றிருந்த மக்கள் மீது அதிவேகமாக வந்த கெப் ரக வாகனத்தைச் செலுத்தி, 6 பேரின் மரணத்திற்குக் காரணமான விபத்துச் சம்பவம் தொடர்பாகக் கைது செய்யப்பட்டுள்ள நான்கு சந்தேகநபர்களையும் எதிர்வரும் ஜூன் மாதம் 30ஆம் திகதி வரை மீண்டும் விளக்கமறியலில் வைக்குமாறு ஹோமாகம நீதவான் நீதிமன்றம் உத்தரவு பிறப்பித்துள்ளது.
விளக்கமறியலில் வைக்கப்பட்டிருந்த சந்தேகநபர்கள் நால்வரும் இன்று (16) ஹோமாகம நீதவான் ரஜிந்ரா ஜயசூரிய முன்னிலையில் ஆஜர்படுத்தப்பட்ட போதே இந்த உத்தரவு பிறப்பிக்கப்பட்டது.
இந்த விபத்து வழக்கின் இன்றைய நீதிமன்ற விசாரணைகளின் போது, பாதிக்கப்பட்ட தரப்புக்கான இடைக்கால நிவாரணம் மற்றும் நட்டஈடு தொடர்பான முக்கிய விபரங்கள் முன்வைக்கப்பட்டன.
விபத்தில் சிக்கி உயிரிழந்த 6 பேரில், ஒருவரது குடும்பத்திற்கு ஏற்கனவே முதற்கட்டமாக ஒரு இலட்சம் ரூபாய் நட்டஈடு வழங்கப்பட்டுள்ளதாக நீதிமன்றத்தில் தெரிவிக்கப்பட்டது.
உயிரிழந்த ஏனைய ஐந்து நபர்களின் குடும்பங்களுக்கும் தலா ஒரு இலட்சம் ரூபாய் வீதம் நட்டஈட்டுத் தொகையை வழங்குவதற்குப் பிரதிவாதிகள் தரப்பு சட்டத்தரணிகள் நீதிமன்றத்தில் உத்தியோகபூர்வமாக உடன்பாடு தெரிவித்துள்ளனர்.
இக்கோர விபத்து தொடர்பான மேலதிக மற்றும் இறுதிப் பொலிஸ் விசாரணை அறிக்கையை அடுத்த வழக்குத் தவணையின் போது நீதிமன்றத்தில் தவறாது சமர்ப்பிக்குமாறு மீகொடை பொலிஸாருக்கு நீதவான் ரஜிந்ரா ஜயசூரிய இதன்போது கடுமையான பணிப்புரை விடுத்தார்.
இதனடிப்படையில், சந்தேகநபர்கள் நால்வரையும் எதிர்வரும் ஜூன் 30ஆம் திகதி வரை தொடர்ந்து விளக்கமறியலில் வைக்குமாறு நீதவான் உத்தரவிட்டார்.
வெசாக் நன்னாளில் தன்சல் வரிசையில் நின்ற அப்பாவிப் பொதுமக்கள் மீது வாகனம் மோதி இடம்பெற்ற இத்துயரச் சம்பவம் ஒட்டுமொத்த நாட்டையும் உலுக்கியிருந்தமை குறிப்பிடத்தக்கது.
