செங்கடல் நுழைவாயிலை மூட தயாராகுங்கள்; ஹவுத்திகளிடம் ஈரான் கூறியதாக தகவல்கள்!

ஈரானின் மின்சார உள்கட்டமைப்புகள் மீது அமெரிக்கா தாக்குதல் நடத்தினால், செங்கடல் வழியாகச் செல்லும் எண்ணெய் போக்குவரத்துப் பாதையை அடைக்கத் தயாராக இருக்குமாறு ஏமனின் ஹவுத்தி அமைப்பிடம் ஈரான் கேட்டுக்கொண்டுள்ளதாக மூன்று வட்டாரங்கள் வியாழக்கிழமை (16) தெரிவித்தன.

இது உலகளாவிய எரிசக்தி விநியோகத்திற்கு ஒரு புதிய மற்றும் தீவிரமான அச்சுறுத்தலை ஏற்படுத்தியுள்ளது.

இஸ்லாமியக் குடியரசின் தலைமை மட்டத்தில் இந்த யோசனை குறித்து விவாதிக்கப்பட்டுள்ளதுடன், ஈரான் ஆதரவு பெற்ற ஹவுத்தி அமைப்பினருக்கும் இத்தகவல் தெரிவிக்கப்பட்டுள்ளது என்று, பெயர் குறிப்பிட விரும்பாத இரண்டு மூத்த ஈரானிய வட்டாரங்களும் இப்பிரச்சினை குறித்து அறிந்த பிராந்திய வட்டாரம் ஒன்றும் தெரிவித்தன.

முன்பு எங்கும் தெரிவிக்கப்படாத தெஹ்ரானின் கோரிக்கை குறித்து ஹவுத்திகளுக்கு அண்மையில் தகவல் தெரிவிக்கப்பட்டதாக அந்த வட்டாரங்கள் தெரிவித்தன.

அது எவ்வாறு தெரிவிக்கப்பட்டது என்பது குறித்தோ, அல்லது செவ்வாய்க்கிழமையன்று ஈரானின் மின்சாரக் கட்டமைப்பு மீது தாக்குதல் நடத்தப்போவதாக அமெரிக்க ஜனாதிபதி டொனால்ட் ட்ரம்ப் விடுத்த அச்சுறுத்தலுக்குப் பின்னர் அது தெரிவிக்கப்பட்டதா என்பது குறித்தோ அவர்கள் மேலதிக விவரங்களை அளிக்கவில்லை.

இது தொடர்பான கருத்துக்கான கோரிக்கைக்கு ஈரானின் வெளியுறவு அமைச்சகமோ அல்லது ஹவுத்தி அமைப்பின் செய்தித் தொடர்பாளரோ உடனடியாகவோ பதிலளிக்கவில்லை என்று சர்வதேச ஊடகங்கள் செய்தி வெளியிட்டுள்ளன.

யேமனின் மலைப்பகுதிகளில், ஹோடைடா மற்றும் ஏடன் வளைகுடாவிற்கு மேலே அமைந்துள்ள பாப் அல்-மண்டப் நீரிணைக்கு (செங்கடலுக்கான நுழைவாயில்) அருகில் ஏவுகணைகள் மற்றும் ட்ரோன்களை நிலைநிறுத்தி கப்பல் போக்குவரத்தின் மீது தாக்குதல் நடத்துவதற்கான ஆயத்தப் பணிகளை ஹவுத்தி அமைப்பு நிறைவு செய்துவிட்டதாகவும், தாக்குதலைத் தொடங்குவதற்கான உத்தரவுக்காகக் காத்திருப்பதாகவும் அந்த அமைப்புக்கு நெருக்கமான வட்டாரங்கள் தெரிவித்தன.

செங்கடலுக்கும் அதன் பாப் அல்-மண்டாப் நுழைவாயிலுக்கும் ஏற்படும் எந்தவொரு அச்சுறுத்தலும், ஈரான் ஹார்முஸ் நீரிணையை மூடியதால் தூண்டப்பட்ட உலகளாவிய எரிசக்தி நெருக்கடியை பெருமளவில் மோசமாக்கும் அபாயத்தைக் கொண்டிருப்பதோடு, ஒரு புதிய சுற்றுப் போரினால் உருவாகும் வெடிக்கும் அபாயங்களையும் அடிக்கோடிட்டுக் காட்டுகிறது.

ஹார்முஸ் நீரிணை ஏற்கனவே மூடப்பட்டுள்ள நிலையில், செங்கடலில் உள்ள கப்பல்கள் அல்லது துறைமுகங்கள் மீது ஹவுத்தி கிளர்ச்சியாளர்கள் மேற்கொள்ளும் எந்தவொரு தாக்குதலும் மத்திய கிழக்கின் இரண்டு முக்கிய எண்ணெய் ஏற்றுமதிப் பாதைகளையும் ஒரே நேரத்தில் முடக்கிவிடும்.

இது எரிசக்தி நெருக்கடி மற்றும் அமெரிக்காவுடனான ஈரானின் பரந்த மோதல் ஆகிய இரண்டிலும் ஒரு புதிய முனையைத் திறந்துவிடும்.

யேமனில் ஏற்கனவே முகாமிட்டுள்ள ஈரானின் இஸ்லாமிய புரட்சிகரப் படைப் பிரிவின் (IRGC) பிரதிநிதிகளே, பாப் அல்-மண்டப் நீரிணையை எப்போது மூடுவது என்பது குறித்த முடிவை மேற்கொள்வார்கள் என்று ஹவுத்திகளுக்கு நெருக்கமான வட்டாரங்கள் தெரிவித்தன.

இப்பிராந்தியத்தில் பதற்றம் அதிகரித்து வருவதைக் குறிக்கும் வகையில், தங்கள் கட்டுப்பாட்டில் இருந்த விமான நிலையம் ஒன்றின் மீது சவுதி அரேபியா குண்டுவீசியதாகக் குற்றம் சாட்டிய ஹவுத்திகள், அந்நாட்டின் மீது ஏவுகணைகளை ஏவினர்.

இதன் மூலம் இரு தரப்பினருக்கும் இடையிலான மோதலில் கடைபிடிக்கப்பட்டு வந்த நான்கு ஆண்டு கால போர்நிறுத்தம் முறியடிக்கப்பட்டுள்ளது.

ரியாத் வட்டாரத்திற்கு நெருக்கமான இரண்டு பிராந்தியத் தரப்புகள், ஈரான் மற்றும் ஹவுத்தி அமைப்பிடமிருந்து வரும் அச்சுறுத்தல்களை சவுதி அரேபியா மிகவும் தீவிரமாகக் கருதுவதாகத் தெரிவித்தன.

மேலும், செங்கடல் விவகாரத்தில் அந்த யேமனியக் குழு தற்போது ஈரானுடன் நெருக்கமாக ஒருங்கிணைந்து செயல்படுவது குறித்தும் ரியாத் அறிந்திருப்பதாக அவை கூறின.

பெப்ரவரி 28 அன்று இஸ்ரேலும் அமெரிக்காவும் ஈரான் மீது தாக்குதல் நடத்தியதைத் தொடர்ந்து இம்மோதல் தொடங்கியது.

இதன் விளைவாக, போருக்கு முந்தைய காலகட்டத்தில் உலகளாவிய எரிசக்தி விநியோகத்தில் சுமார் ஐந்தில் ஒரு பங்கைக் கையாண்ட முக்கியப் பாதையான ஹார்முஸ் நீரிணையை ஈரான் மூடியது. 

தெஹ்ரானுக்கும் வொஷிங்டனுக்கும் இடையே ஜூன் மாதம் ஏற்பட்ட ஒரு நிலையற்ற போர்நிறுத்த ஒப்பந்தம் முறிந்ததிலிருந்து பதற்றம் அதிகரித்துள்ளது. 

இது ஒரு முழு அளவிலான போர் குறித்த அச்சங்களை மீண்டும் எழுப்பி, நீரிணை வழியாகச் செல்லும் எரிசக்தி ஓட்டத்தையும் சீர்குலைத்துள்ளது.

அதன்பிறகு, பாரசீக வளைகுடா எண்ணெயின் கணிசமான அளவு சவுதி குழாய் வழியாக செங்கடலுக்குத் திருப்பிவிடப்பட்டுள்ளது. 

மேலும், தற்போது இந்த நீர்வழிப்பாதை உலகளாவிய எரிசக்தி விநியோகத்தில் சுமார் 7%-ஐக் கொண்டு செல்கிறது.

காசா போரின்போது ஹவுத்திகள் கப்பல் போக்குவரத்தைத் தாக்கியபோது, ​​முன்னணி கப்பல் நிறுவனங்கள் தங்கள் சரக்குக் கப்பல்களை ஆப்பிரிக்க கண்டத்தைச் சுற்றியுள்ள, மிக நீண்ட மற்றும் அதிக செலவுபிடிக்கும் வழித்தடத்திற்கு மாற்றின.

சவுதி அரேபியாவே தனது எரிசக்தி ஏற்றுமதியில் 70 சதவீதத்தை செங்கடல் பகுதியிலுள்ள யான்பு (Yanbu) துறைமுகத்தின் வழியாக மாற்றி அமைத்துள்ள நிலையில், அங்கு நடத்தப்படும் நேரடித் தாக்குதல்கள் எண்ணெய் சந்தைகளுக்குப் பெரும் சிக்கலை ஏற்படுத்தும்.

ஈரான், ஹவுத்திகளைத் தனது பிராந்திய “எதிர்ப்பு அச்சு” கூட்டணியின் ஒரு பகுதியாகக் கருதுகிறது. 

இந்தக் கூட்டணியில், லெபனானின் ஹிஸ்புல்லா மற்றும் ஈராக்கிய ஷியா ஆயுதக் குழுக்களும் அடங்கும்; இவை ஏற்கெனவே தெஹ்ரானுக்கும் வொஷிங்டனுக்கும் இடையிலான பிராந்திய மோதலில் இணைந்துவிட்டன.

ஆனால், ஹவுத்தி கிளர்ச்சியாளர்கள் அதிகாரப்பூர்வமாக மோதலில் ஈடுபடவில்லை.

ஹிஸ்புல்லா அமைப்பு மூலமான ஆதரவு உட்பட, ஹத்திகளுக்கு ஆயுதங்கள், நிதி மற்றும் பயிற்சிகளை ஈரான் வழங்கியுள்ளதாக அமெரிக்கா கூறுகிறது. 

இந்தக்குற்றச்சாட்டை தெஹ்ரான் மறுத்துள்ளது.