ட்ரம்பை குறிவைத்த ஈரான்? ரகசிய உளவுத் தகவல்களால் பரபரப்பு!

ஜனாதிபதி டொனால்ட் ட்ரம்பைக் கொலை செய்ய ஈரான் திட்டமிட்டிருந்ததாக இஸ்ரேல் கடந்த ஓராண்டில் பலமுறை அமெரிக்காவை எச்சரித்துள்ளதாக வொஷிங்டனின் தற்போதைய அதிகாரி மற்றும் இரண்டு முன்னாள் அதிகாரிகள் தெரிவித்துள்ளனர்.

அவர்களது கூற்றுப்படி, இதில் துருக்கியில் மேற்கொள்ளப்பட்ட ‘ஏர் ஃபோர்ஸ் ஒன்’ (Air Force One) தொடர்பான ஒரு ரகசிய தந்திரோபாய நடவடிக்கைக்கு முந்தைய எச்சரிக்கையும் அடங்கும்.

எனினும், இந்தத் தகவலை அமெரிக்க உளவுத்துறை அதிகாரிகளால் சுயாதீனமாக உறுதிப்படுத்த முடியவில்லை.

அமெரிக்க உளவுத்துறையினரிடம் அளிக்கப்பட்டும், சில சமயங்களில் இஸ்ரேலிய அதிகாரிகளால் வெள்ளை மாளிகையின் உயர்மட்ட அதிகாரிகளிடம் நேரடியாகத் தெரிவிக்கப்பட்டும் வந்த அந்த எச்சரிக்கைகளில், ஒரு பெரிய பொது நிகழ்ச்சியின்போது துப்பாக்கி சுடும் நிபுணரைக் (sniper) கொண்டு ட்ரம்ப் மீது தாக்குதல் நடத்துவது அல்லது கத்தியால் தாக்குவதற்கு ஒருவரைத் தயார்படுத்துவது போன்ற சதித்திட்டங்கள் குறித்த தகவல்கள் அடங்கியிருந்ததாக அந்த வட்டாரங்கள் தெரிவித்தன. 

2025 ஜூனில் நடைபெற்ற 12 நாள் போருக்கு முந்தைய காலகட்டத்தில் இத்தகவல்கள் கிடைக்கத் தொடங்கியதாகவும், பெப்ரவரி மாதத்தில் ஈரான் மீது போர் தொடுப்பதற்கான அமெரிக்காவின் முடிவுக்கு முன்னதாக அவை மேலும் தீவிரமடைந்ததாகவும் அந்த வட்டாரங்கள் கூறின.

அங்காராவில் ஜூலை மாதம் நடைபெற்ற நேட்டோ (NATO) உச்சிமாநாட்டிற்கு முன்னதாகவே மிக விரிவான எச்சரிக்கை விடுக்கப்பட்டதாக, அமெரிக்க அதிகாரி மற்றும் இவிடயம் தெரிந்த மற்றொரு நபர் ஆகியோர் தெரிவித்தனர். 

உச்சிமாநாட்டிற்காக ‘ஏர் ஃபோர்ஸ் ஒன்’ (Air Force One) விமானத்தில் ட்ரம்ப் பயணம் செய்யும்போது, ​​தோளில் வைத்து ஏவக்கூடிய ஏவுகணையைப் பயன்படுத்தி அவரைக் கொல்ல ஈரான் முயற்சிக்கக்கூடும் என்பதைக் குறிக்கும் உளவுத் தகவல் குறித்து இஸ்ரேலிய அதிகாரிகள் வெள்ளை மாளிகைக்குத் தெரிவித்ததாக அந்த அதிகாரிகள் கூறினர்.

2020-ஆம் ஆண்டில் ஈரான் இராணுவத் தளபதி காசிம் சுலைமானியை ட்ரம்ப் கொன்றதற்குப் பதிலடி கொடுக்க ஈரான் விரும்புவதாக அமெரிக்க உளவுத்துறை நீண்ட காலமாகவே மதிப்பிட்டு வருகிறது. 

ஆனால், கடந்த ஆண்டின் தொடக்கம் முதல் இஸ்ரேலிய உளவுத்துறை பகிர்ந்து வந்த ட்ரம்ப் மீதான சில குறிப்பிட்ட கொலை மிரட்டல்களை உறுதிப்படுத்த மத்திய உளவு முகமையால் (CIA) முடியவில்லை என்று அதிகாரிகள் தெரிவித்தனர்.

நேட்டோ (NATO) தொடர்பான அந்தச் சம்பவத்தைப் பொறுத்தவரை, ட்ரம்ப்பின் உயிருக்கு ஆபத்து இருப்பதாக இஸ்ரேல் முன்வைத்த கூற்றை உறுதிப்படுத்தும் வகையிலான எந்த ஆதாரமும் தங்கள் நாட்டு உளவுத்துறையிடம் இல்லை என்று துருக்கிய அதிகாரி ஒருவர் தெரிவித்தார்; 

இந்த மதிப்பீட்டை அந்த நாடானது அமெரிக்கர்களுடனும் பகிர்ந்துகொண்டது.

உறுதிப்படுத்தப்பட்ட தகவல்கள் இல்லையென்றாலும், மிகுந்த முன்னெச்சரிக்கை நடவடிக்கையாக அச்சுறுத்தல்களைக் குறைப்பதற்கான நடவடிக்கைகளை வெள்ளை மாளிகை அதிகாரிகளும் ‘சீக்ரெட் சர்வீஸ்’ (Secret Service) அமைப்பினரும் மேற்கொண்டுள்ளனர்.

இதில் துருக்கிப் பயணத்தின்போது ட்ரம்ப் நாட்டை விட்டு வெளியேறுவதற்காக ‘ஏர் ஃபோர்ஸ் ஒன்’ (Air Force One) விமானத்திலிருந்து வேறொரு விமானத்திற்கு மாற்றப்பட்ட ஒரு அசாதாரணமான ஏமாற்று நடவடிக்கையும் அடங்கும்.

ஈரானுடனான பதற்றம் அதிகரித்துள்ள சூழலிலும், ஈரானால் விளையக்கூடிய ஒட்டுமொத்த அச்சுறுத்தல் குறித்த அமெரிக்க மற்றும் இஸ்ரேலிய உளவுத்துறை மதிப்பீடுகளுக்கு இடையே பரவலான கருத்து வேறுபாடுகள் நிலவும் நிலையிலும், ஈரான் விவகாரத்தில் ட்ரம்ப் நிர்வாகத்தின் முடிவெடுக்கும் செயல்முறையை இஸ்ரேலிய உளவுத்துறை எவ்வாறு பாதிக்கிறது என்பதை அந்தச் சம்பவம் அடிக்கோடிட்டுக் காட்டுகிறது.

இந்த ஆண்டின் தொடக்கத்தில், ஈரான் அணு ஆயுதத்தை தீவிரமாக உருவாக்கவில்லை என்று அமெரிக்க உளவு அமைப்புகள் மதிப்பிட்டன.

அதே நேரத்தில், தெஹ்ரான் ஒரு அவசர அச்சுறுத்தலை ஏற்படுத்துகிறது என்று இஸ்ரேல் வாதிட்டது. 

அமெரிக்க உளவுத்துறையின் அறிக்கைகள் இருந்தபோதிலும், ட்ரம்ப் பெப்ரவரியில் ஈரான் மீதான தாக்குதல்களை முன்னெடுத்தார். 

இராணுவ நடவடிக்கையைத் தொடங்குவதற்கு முன்பு, தெஹ்ரான் தன்னைக் கொல்ல முயன்றதாக இஸ்ரேல் பகிர்ந்த உளவுத் தகவல்களையும் ட்ரம்ப் கருத்தில் கொண்டார் என்று ரொய்ட்டர்ஸ் முன்பு செய்தி வெளியிட்டிருந்தது.

ஈரான் மீதான அமெரிக்கக் கொள்கையில் செல்வாக்கு செலுத்த இஸ்ரேல் தனது உளவுத் தகவல்களைப் பயன்படுத்துகிறது என்பதை இஸ்ரேலிய தூதரகத்தின் செய்தித் தொடர்பாளர் மறுத்தார்.

வெள்ளை மாளிகையும் சிஐஏ (CIA)-வும் இது குறித்து கருத்து தெரிவிக்க மறுத்துவிட்டன.

இரகசியப் பாதுகாப்புப் பிரிவின் (Secret Service) செய்தித் தொடர்பாளர் அந்தோனி குக்லியெல்மி, குறிப்பிட்ட உளவுத்துறை விவகாரங்கள் குறித்துப் பேச மறுத்துவிட்டார்.

இருப்பினும், அண்மைய படுகொலை முயற்சிகள் மற்றும் ஜனாதிபதிக்கு எதிரான அச்சுறுத்தல்கள் அதிகரித்துள்ள சூழலில், ட்ரம்ப்பின் பாதுகாப்பை உறுதி செய்வதில் தங்கள் அமைப்பு தொடர்ந்து கவனம் செலுத்தி வருவதாக அவர் கூறினார்.