30 வயதை கடந்தவர்கள் தினமும் 30 நிமிடங்கள் நடப்பதை, ஒரு பழக்கமாக மாற்றிக் கொண்டால், அவர்களால் ஆரோக்கியத்துடன் இருக்க முடியும் என்பது நம் அனைவருக்குமே தெரிந்ததுதான். ஆனால், தினமும் நடப்பது இரத்த சர்க்கரையைக் கட்டுப்படுத்துமா? உண்மை என்ன? இங்கே தெரிந்துகொள்வோம்.
இப்போதெல்லாம் பல உடல்நலப் பிரச்சனைகளுக்கு முக்கிய காரணம் உடல் உழைப்பின்மையே. அதிலும் நீண்ட நேரம் உட்கார்ந்திருப்பது, உணவுப் பழக்க மாற்றங்கள் மற்றும் மன அழுத்தம் போன்ற காரணங்களால் நீரிழிவு நோய் போன்ற பிரச்சனைகள் வேகமாக அதிகரித்து வருகின்றன. அதனாலேயே தினமும் 30 நிமிடங்கள் நடப்பதை வழக்கமாக்கிக் கொண்டால், உங்கள் உடல்நலம் மேம்படும் என தொடர்ந்து வைத்தியர்கள் அறிவுறுத்தி வருகின்றனர். ஆனால், தினமும் நடப்பது எந்தெந்த வகையில் பலனளிக்கும் என்பது பலருக்கும் தெரிவதில்லை. குறிப்பாக நீரிழிவு அபாயத்தை இது எந்தளவு தடுக்கும் என தெரிவதில்லை.
இதுகுறித்து பேட்டியளித்த நாளமில்லாச் சுரப்பியியல் மற்றும் நீரிழிவு நோய் நிபுணர் பிரணவ் கோடே,
“வழக்கமான நடைப்பயிற்சி என்பது, இரத்த சர்க்கரை அளவைக் கட்டுப்படுத்த உதவும். காரணம் நமது உடல் நீண்ட நேரம் செயலற்று இருந்தால், குளுக்கோஸ் சரியாகப் பயன்படுத்தப்படுவதில்லை. இதனால் இன்சுலின் எதிர்ப்பு அதிகரித்து, நீரிழிவு நோய் ஏற்படும் அபாயமும் அதிகரிக்கிறது. அதுவே, வழக்கமாக நடப்பது என்பது தசைகளைச் சுறுசுறுப்பாக வைத்திருப்பதோடு, ரத்தத்தில் உள்ள குளுக்கோஸை ஆற்றலாகப் பயன்படுத்துகிறது. இது இயற்கையாகவே சர்க்கரை அளவைக் குறைக்கிறது” என்கிறார்.
நடைப்பயிற்சியிலேயே வேகமாக நடப்பது அதிக நன்மை பயக்கும். ஏனெனில் இவ்வாறு நடப்பது, உடல் குளுக்கோஸை வேகமாக உறிஞ்சிக்கொள்ள உதவுவதோடு, இன்சுலின் உணர்திறனையும் மேம்படுத்துகிறது. இதன் பொருள், உடலால் குறைந்த இன்சுலினைக் கொண்டே சர்க்கரையைக் கட்டுப்படுத்த முடியும் என்பதாகும். இது வகை 2 நீரிழிவு நோயின் அபாயத்தைக் குறைக்கிறது. மேலும், செரிமான அமைப்பையும் மேம்படுத்துகிறது.
பிற நேரங்களை காட்டிலும் சாப்பிட்ட பிறகு நடப்பது மிகவும் நல்லது. இதன் மூலம் சாப்பிட்ட பிறகு ரத்தச் சர்க்கரை அளவு திடீரென உயர்வதைத் தடுக்க உதவுகிறது. ஒருநாளில் வெறும் 10-15 நிமிடங்கள் வேகமாக செய்யும் நடைப்பயிற்சி கூட நல்ல பலனைத் தரும். குடும்பத்தில் நீரிழிவு நோய் உள்ளவர்களுக்கும் அல்லது அந்நோய் ஏற்படும் அபாயத்தில் இருப்பவர்களுக்கும் இந்தப் பழக்கம் இன்னும் முக்கியமானது.
வாரத்தின் பெரும்பாலான நாட்களில் குறைந்தது 30 நிமிடங்கள் நடப்பது போதுமானது என்று நிபுணர்கள் கூறுகின்றனர். அந்நாட்களில் கடினமான உடற்பயிற்சிகளைச் செய்ய வேண்டியதுகூட கட்டாயமில்லை. நடைப்பயிற்சியுடன், சமச்சீரான உணவை உண்பதும் அவசியம். பதப்படுத்தப்பட்ட உணவுகளையும், அதிக சர்க்கரை உள்ள உணவுகளையும் குறைப்பது நல்லது. மேலும், ஆரோக்கியத்திற்குப் போதுமான தூக்கம் பெறுவதும் இன்றியமையாதது.
ஆகவே, தினமும் நடக்கும் ஒரு சிறிய பழக்கம்கூட நாம் நினைத்திடாத பல நன்மைகளைத் தரும். நீரிழிவு நோயைக் கட்டுப்படுத்துவது மட்டுமின்றி, நீரிழிவு அபாயத்தையும் குறைக்கும். மேலும் உடலை ஆரோக்கியமாகவும் சுறுசுறுப்பாகவும் வைத்திருக்கவும் உதவும். எனவே, இன்றிலிருந்தே நடைப்பயிற்சியை ஒரு பழக்கமாக மாற்றி, ஆரோக்கியமான வாழ்க்கையை வாழுங்கள்.
