நாடு முழுவதும் ஏற்பட்டுள்ள மின் தடையின் துல்லியமான காரணம் இன்னும் கண்டறியப்படவில்லை என்றும், அதேவேளையில் மின்சார விநியோகத்தை படிப்படியாக மீட்டெடுக்கும் பணிகள் நடைபெற்று வருகின்றன என்றும் அமைச்சர் அனுர கருணாதிலக்க தெரிவித்துள்ளார்.
வெள்ளிக்கிழமை (16) கொத்மலையில் உள்ள மின் உற்பத்தி நிலையத்தில் ஏற்பட்ட தொழில்நுட்பக் கோளாறு, இந்த மின் தடையை ஏற்படுத்தியிருக்கக்கூடிய காரணிகளில் ஒன்றாக இருக்கலாம் என்று அவர் குறிப்பிட்டார்.
ஒரு பகுதியில் மின்சாரம் ஏற்கனவே மீட்டெடுக்கப்பட்டுள்ளதாகவும், ஏனைய பகுதிகளிலும் படிப்படியாக மின்சாரம் வழங்கப்படும் என்றும் அமைச்சர் தெரிவித்தார்.
தேசிய மின் கட்டமைப்பை மீண்டும் இயல்பு நிலைக்குக் கொண்டுவரும் முயற்சிக்கு ஒத்துழைக்கும் வகையில், வீட்டின் கூரைகளில் சூரிய சக்தி மின் தகடுகளை (Solar Panels) அமைத்துள்ளவர்கள், அவற்றை அணைத்து வைக்குமாறும் அவர் கேட்டுக்கொண்டார்.
மின் தடைக்கான காரணங்கள் குறித்த விசாரணை தொடர்ந்து நடைபெற்று வரும் அதே வேளையில், நாடு முழுவதும் மின்சாரத்தை விரைவாக மீட்டெடுப்பதே தற்போதைய உடனடி முன்னுரிமை என்று அமைச்சர் கூறினார்.
