இந்தியாவும் ஆசியான் நாடுகளும் இணைந்து உலக மக்கள் தொகையில் சுமார் கால் பங்கைக் கொண்டுள்ளதாகத் தெரிவித்த இந்தியப் பிரதமர் நரேந்திர மோடி, இந்த மக்களின் எதிர்காலம் போட்டியின் ஊடாக அல்லாமல் ஒத்துழைப்பின் ஊடாகவே வடிவமைக்கப்பட வேண்டும் என வலியுறுத்தியுள்ளார்.
பிலிப்பைன்ஸ் தலைநகர் மணிலாவில் நடைபெற்ற 23ஆவது ஆசியான் – இந்தியா உச்சி மாநாட்டில் உரையாற்றியபோதே அவர் இதனைத் தெரிவித்துள்ளார்.
இந்தியாவுக்கும் ஆசியான் நாடுகளுக்கும் இடையிலான கூட்டாண்மை தொடர்ச்சியாக வளர்ச்சியடைந்து வருவதாகக் குறிப்பிட்ட அவர், இந்தோ – பசிபிக் பிராந்தியத்தில் அமைதி, நிலைத்தன்மை மற்றும் செழிப்பை உறுதிப்படுத்த இருதரப்பும் இணைந்து செயற்பட வேண்டியதன் அவசியத்தையும் வலியுறுத்தியுள்ளார்.
ஆசியான் – இந்தியா உச்சி மாநாட்டில் தாம் 13ஆவது முறையாகப் பங்கேற்பதாகக் குறிப்பிட்ட மோடி, இந்தியாவின் கிழக்கை நோக்கிய செயல்பாட்டுக் கொள்கை கடந்த சில ஆண்டுகளில் இந்தியா – ஆசியான் உறவுகளுக்கு புதிய உத்வேகத்தையும் ஆழத்தையும் வழங்கியுள்ளதாகத் தெரிவித்துள்ளார்.
பகிரப்பட்ட கலாசாரம் மற்றும் பாரம்பரியத்தின் அடிப்படையில் கட்டியெழுப்பப்பட்டுள்ள இந்த உறவு, தற்போது டிஜிட்டல் தொழில்நுட்பம், பாதுகாப்பு மற்றும் விண்வெளி உள்ளிட்ட புதிய துறைகளிலும் விரிவடைந்து வருவதாக அவர் சுட்டிக்காட்டியுள்ளார்.
2014ஆம் ஆண்டு முதல் மக்களிடையிலான தொடர்புகளை வலுப்படுத்தும் நோக்கில் இந்தியாவும் ஆசியான் நாடுகளும் 100க்கும் மேற்பட்ட முன்னெடுப்புகளை மேற்கொண்டுள்ளதாகவும், 250க்கும் மேற்பட்ட விரைவான தாக்கத்தை ஏற்படுத்தும் திட்டங்கள் ஆரம்பிக்கப்பட்டுள்ளதாகவும் அவர் குறிப்பிட்டுள்ளார்.
மேலும், திறன் மேம்பாட்டுக்காக 10 ஆயிரத்துக்கும் மேற்பட்ட கல்வி உதவித்தொகைகள் வழங்கப்பட்டுள்ளதாகவும், இந்தியாவுக்கும் ஆசியான் நாடுகள் ஒன்பதுக்கும் இடையிலான நேரடி விமானச் சேவைகள் மற்றும் சுற்றுலாத்துறையின் வளர்ச்சி இருதரப்பு உறவுகளின் நெருக்கத்தை வெளிப்படுத்துவதாகவும் தெரிவித்துள்ளார்.
இந்தியாவுக்கும் ஆசியான் நாடுகளுக்கும் இந்தப் பிராந்தியத்தை அமைதி மற்றும் நிலைத்தன்மையின் அடையாளமாக மாற்றுவதற்கான திறனும் உறுதியும் உள்ளதாகக் குறிப்பிட்ட அவர், இந்தியாவின் வளர்ச்சியும் ஆசியான் அமைப்பின் செழிப்பும் ஒன்றோடொன்று நெருக்கமாகப் பிணைந்துள்ளதாகவும் தெரிவித்துள்ளார்.
கடந்த 12 ஆண்டுகளில் இருதரப்பு கூட்டாண்மை புத்துயிர் பெற்றுள்ளதாகவும், பிராந்தியத்தின் எதிர்காலத்துக்கான புதிய பாதையை வகுக்க வேண்டியது அவசியம் என்றும் இந்தியப் பிரதமர் நரேந்திர மோடி மேலும் வலியுறுத்தியுள்ளார்.

















