இந்தியக் கிரிக்கெட் அணிக்கெதிரான இரண்டாவது ஒருநாள் போட்டியில், இங்கிலாந்துக் கிரிக்கெட் அணி 100 ஓட்டங்கள் வித்தியாசத்தில் வெற்றிபெற்றது.
இந்த வெற்றியின் மூலம் மூன்று போட்டிகள் கொண்ட ஒருநாள் தொடரை இங்கிலாந்து அணி, 1-1 என்ற கணக்கில் சமநிலைப்படுத்தியுள்ளது.
லண்டன்- லோட்ஸ் மைதானத்தில் நேற்று (வியாழக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற இந்தியக் கிரிக்கெட் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இங்கிலாந்துக் கிரிக்கெட் அணி, 49 ஓவர்கள் நிறைவில் அனைத்து விக்கெட்டுகளையும் இழந்து 246 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, மொயின் அலி 47 ஓட்டங்களையும் வில்லி 41 ஓட்டங்களையும் பெற்றுக்கொண்டனர்.
இந்தியக் கிரிக்கெட் அணியின் பந்துவீச்சில், சஹால் 4 விக்கெட்டுகளையும் பும்ரா மற்றும் ஹர்திக் பாண்ட்யா ஆகியோர் தலா 2 விக்கெட்டுகளையும் ஷமி மற்றும் பிரசீத் ஆகியோர் தலா 1 விக்கெட்டினை வீழ்த்தினர்.
இதனைத்தொடர்ந்து 247 என்ற வெற்றி இலக்கை நோக்கி பதிலுக்கு களமிறங்கிய இந்திய அணி, 38.5 ஓவர்கள் நிறைவில் 146 ஓட்டங்களுக்கு சுருண்டது. இதனால், இங்கிலாந்துக் கிரிக்கெட் அணி 100 ஓட்டங்கள் வித்தியாசத்தில் வெற்றிபெற்றது.
இதன்போது அணியின் அதிகப்பட்ச ஓட்டங்களாக, ஹர்திக் பாண்ட்யா மற்றும் ரவீந்திர ஜடேஜா ஆகியோர் தலா 29 ஓட்டங்களை பெற்றுக்கொண்டனர்.
இங்கிலாந்துக் கிரிக்கெட் அணியின் பந்துவீச்சில், ரீஸ் டொப்லே 6 விக்கெட்டுகளையும் டேவிட் வில்லி, கார்ஸ், மொயின் அலி மற்றும் லிவிங்ஸ்டன் ஆகியோர் தலா 1 விக்கெட்டினை வீழ்த்தினர்.
இப்போட்டியின் ஆட்டநாயகனாக பந்துவீச்சில், 6 விக்கெட்டுகளை சாய்த்த இங்கிலாந்து பந்துவீச்சாளர் ரீஸ் டொப்லே தெரிவுசெய்யப்பட்டார்.
