தாய்வான் அருகே ஐம்பத்தேழு சீன விமானங்களும் நான்கு போர்க்கப்பல்களும் நாளொன்றில் கண்டறியப்பட்டன.
மேலும் அவை சீனா நடத்திய கூட்டுப் போர் பயிற்சியின் ஒரு பகுதியாகும் என தாய்வானின் தேசிய பாதுகாப்பு அமைச்சு தெரிவித்துள்ளது.
இவற்றில் 28 விமானங்கள் தாய்வான் ஜலசந்தியின் எல்லைக்கோட்டைக் கடந்து தாய்வானின் வான் பாதுகாப்பு அடையாள மண்டலத்திற்குள் பிரவேசித்துள்ளமை உறுதிப்படுத்தப்பட்டுள்ளன.
அவ்விமானங்களில் மூன்று BZK-005 வகையான ஆளில்லா விமானங்களும், ஆறு J-11 போர் விமானங்கள்12 , J-16 போர் விமானங்கள் மற்றும் இரண்டு Sukhoi Su-30 விமானங்கள் உள்ளடங்குகின்றன.
தாய்வான் குறித்த செயற்பாட்டிற்கு கப்பல்கள், விமானங்கள் மற்றும் நிலம் சார்ந்த ஏவுகணை அமைப்புகளை நிலைநிறுத்துவதன் மூலமும், ரேடியோ எச்சரிக்கைகளை வழங்கியதன் மூலமும் சீனாவின் இந்த நடவடிக்கைக்கு பதிலளித்துள்ளது.
அமெரிக்க ஜனாதிபதி ஜோ பைடன் கடந்த டிசம்பர் 23 அன்று தேசிய பாதுகாப்பு அங்கீகார சட்டத்தில் கையெழுத்திட்டதிலிருந்து தாய்வான் அருகே சீன மக்கள் விடுதலை இராணுவத்தின் கிழக்கு பிராந்திய படைப்பிரிவு நடத்திய இரண்டாவது சுற்று இராணுவ பயிற்சி இதுவாகும்.
அதேநேரம், அடுத்த ஐந்து ஆண்டுகளில் அமெரிக்காவிடமிருந்து ஆயுதங்களை கொள்வனவு செய்வதற்கு 10 பில்லியன் டொலர்கள் கடன் வழங்கப்படுமெனவும் அறிவிக்கப்பட்டுள்ளது.
இந்த நிலையில் கடந்த டிசம்பர் 25 அன்று சினாவினால் தொடங்கப்பட்ட முதல் சுற்று பயிற்சியில், மொத்தம் 71 விமானங்கள் மற்றும் ஏழு போர்க்கப்பல்களை தாய்வான் அருகே உள்ள பகுதிகளுக்கு 24 மணி நேரத்திற்கும் மேலாக செயற்பாட்டில் இருந்துள்ளன.
இதேநேரம் 47 விமானங்கள் தாய்வான் ஜலசந்தியின் எல்லைக் கோட்டைக் கடந்துள்ளன.
சீனாவின் கிழக்கு பிராந்தியப் பிரிவானது, சமீபத்திய கடற்படை-வான்வழி பயிற்சிகள், தாய்வான் சுதந்திரப் படைகளின் தொடர்ச்சியான ஆத்திரமூட்டல்களுக்கு முகங்கொடுக்கும் வகையில் தமது போர்த் திறனை சோதிக்கும் நோக்கத்தினை அடிப்படையாகக் கொண்டது என்று அறிவித்துள்ளது.
இதற்கு பதிலளிக்கும் விதமாக, தாய்வானின் ஜனாதிபதி அலுவலக செய்தித் தொடர்பாளர் சேவியர் சாங், “சீனா ஆதாரமற்ற குற்றச்சாட்டுகளை சுமத்துகிறது.
தாய்வானின்; இறையாண்மை மற்றும் தேசிய பாதுகாப்பைப் பாதுகாப்பதற்காகவே தாய்வான் இராணுவம் செயற்படுகின்றது.
மேலும் அது பதட்டங்களைத் தூண்டாது பிராந்தியத்தில் மோதலைத் தூண்டாது. பிராந்திய அமைதி மற்றும் ஸ்திரத்தன்மையைப் பாதுகாப்பது ஜலசந்தியின் இரு தரப்பினரின் பொறுப்பு.“ என்றார்.
