பல மாதங்களாக நீடித்த அரசியல் கொந்தளிப்புக்குப் பின்னர், புதிய ஜனாதிபதியை தேர்ந்தெடுப்பதற்காக மில்லியன் கணக்கான தென் கொரியர்கள் திடீர் தேர்தலில் செவ்வாய்க்கிழமை (03) வாக்களித்து வருகின்றனர்.
தேர்தலில் யார் வெற்றி பெற்றாலும், புதிய ஜனாதிபதியாக வருபவர் சீர்குலைந்துள்ள உள்நாட்டுப் பொருளாதார மீட்பு, அதன் நட்பு நாடான அமெரிக்காவிற்கும் சீனாவிற்கும் இடையிலான பதட்டங்களைத் தணிப்பது உள்ளிட்ட கடுமையான சவால்களை எதிர்கொள்வார்.
புதிய ஜனாதிபதிக்கான போட்டியில் மத்தியவாத ஜனநாயகக் கட்சியின் வேட்பாளர் லீ ஜே-மியுங், பழமைவாத மக்கள் சக்தி கட்சியைப் பிரதிநிதித்துவப்படுத்தும் கிம் மூன்-சூக்கு எதிராகப் போட்டியிடுகிறார்.
தேர்தலுக்கு முந்தைய கருத்துக் கணிப்புகள் லீ வெற்றி பெறுவதற்கான வாய்ப்புகள் அதிகம் என்று காட்டுகின்றன.
லீ, வீழ்ந்துள்ள தனது நாட்டை கட்டியெழுப்புவதாகவும், அதன் பொருளாதாரத்தை உயர்த்தவும் தேர்தல் பிரச்சாரத்தின் போது உறுதியளித்துள்ளார்.
மேலும், சமநிலையான இராஜதந்திரத்தையும் அவர் ஆதரித்துள்ளார்.
தேசிய பாதுகாப்பின் அடித்தளமாக அமெரிக்காவுடனான கூட்டணியைப் பேணுகையில், சீனா மற்றும் வட கொரியாவுடனான தனது நாட்டின் பதட்டமான உறவுகளை சரிசெய்வதாக உறுதியளித்துள்ளார்.
கிம் வெற்றி பெற்றால், முன்னாள் ஜனாதிபதி யூன் சுக் இயோலின் பழமைவாத வெளியுறவுக் கொள்கையை அவர் தொடருவார்.
இது பியோங்யாங் மற்றும் பெய்ஜிங்கை பகைத்துக் கொள்ளும் நிலையில் வொஷிங்டன் மற்றும் டோக்கியோவுடனான உறவுகளை வலுப்படுத்துவதில் கவனம் செலுத்தும்.
தென் கொரியா முழுவதும் வாக்குப்பதிவு அந்நாட்டு நேரப்படி செவ்வாய்க்கிழமை (03) காலை 6 மணிக்குத் தொடங்கி இரவு 8 மணிக்கு முடிவடையும்.
நாட்டின் மூன்று முக்கிய ஒளிபரப்பாளர்களான KBS, MBC மற்றும் SBS ஆகியவற்றின் கூட்டு வாக்கெடுப்பின் முடிவுகள், வாக்குப்பதிவு முடிந்தவுடன் விரைவில் வெளியிடப்படும்.
யார் வெற்றி பெற்றனர் என்பதை நாடு அறிய புதன்கிழமை (04) அதிகாலைக்குள் போதுமான வாக்குகள் எண்ணப்பட்டிருக்கும் என்று கருத்துக்கணிப்பு நிபுணர்கள் தெரிவித்தனர்.
தென் கொரியாவின் அரசியல் கொந்தளிப்பானது, தனது மூன்று ஆண்டுகால பதவிக்காலத்தில் பிரபலமற்றவராக இருந்த யூன், டிசம்பரில் குறுகிய கால இராணுவச் சட்டத்தை அமல்படுத்தியபோது, எதிர்க்கட்சி கட்டுப்பாட்டில் உள்ள தேசிய சட்டமன்றத்தை இராணுவப் படையால் கைப்பற்ற முயன்றபோது தொடங்கியது.
பின்னர் அவர் சட்டமன்றத்தால் பதவி நீக்கம் செய்யப்பட்டார்.
ஏப்ரல் மாதத்தில் அரசியலமைப்பு நீதிமன்றத்தால் முறையாக பதவியில் இருந்து வெளியேற்றப்பட்டார்.
இது செவ்வாய்க்கிழமை (03) தேர்தலுக்கு வழிவகுத்தது.
டிசம்பரில் யூன் பதவி நீக்கம் செய்யப்பட்டதிலிருந்து தென் கொரியா தொடர்ந்து தேர்ந்தெடுக்கப்படாத தற்காலிக ஜனாதிபதிகளால் வழிநடத்தப்பட்டு வருகிறது.
மக்கள் வாக்கெடுப்பு மூலம் புதிய தலைவரைத் தேர்ந்தெடுப்பது நாட்டை நிலைப்படுத்துவதற்கான ஒரு முக்கிய படியாகும்.
ஆனால், தேர்தலில் யார் வெற்றி பெற்றாலும் அது ஒரு நாட்டை நெருக்கடியில் வழிநடத்தும்.
அரசியல் கொந்தளிப்பினால் தென் கொரியாவின் ஏற்றுமதி சார்ந்த பொருளாதாரம் வளர்ச்சியை கிட்டத்தட்ட முடங்கியுள்ளது.
அமெரிக்க ஜனாதிபதி டெனால்ட் ட்ரம்பின் கடுமையான வரிகளால் இது மேலும் பாதிக்கப்பட வாய்ப்புள்ளது.
ஏற்றுமதி மற்றும் பொருளாதார வளர்ச்சியை ஊக்குவிக்க, தென் கொரியாவின் மிகப்பெரிய வர்த்தக பங்காளியான சீனாவுடன் புதிய தலைவர் உறவுகளை சரிசெய்ய வேண்டும்.
ஆனால், அதன் ஒரே இராணுவ நட்பு நாடான அமெரிக்கா, தென் கொரியா சீனாவை கட்டுப்படுத்த உதவ வேண்டும் என்று கோருகிறது.
மேலும் தென் கொரியர்கள் முன்னெப்போதையும் விட அதிகமாக பிளவுபட்டுள்ளமையும் குறிப்பிடத்தக்கது.
