இங்கிலாந்துக்கு எதிரான ஐந்தாவதும் இறுதியுமான ஆஷஸ் டெஸ்ட் போட்டியில் இன்று (08) அவுஸ்திரேலிய அணி 05 விக்கெட்டுகளினால் வெற்றி பெற்றது.
இந்த வெற்றியுடன் தொடரை 4:1 என்ற கணக்கில் கைப்பற்றிய பேட் கம்மின்ஸ் தலைமையிலான அணியானது ஓய்வு பெறும் சக வீரர் உஷ்மன் கவாஜாவை சந்தோசத்துடன் வழி அனுப்பியது.
ஜனவரி 03 ஆம் திகதி சிட்டியில் ஆரம்பமான இந்தப் போட்டியில் நாணய சுழற்சியில் வெற்றி பெற்ற பென் ஸ்டோக்ஸ் தலைமையிலான அணியானது முதலில துடுப்பெடுத்தாட்டம் மேற்கொள்ளத் தீர்மானித்தது.
அந்த அணி தனது முதல் இன்னிங்சில் 384 ஓட்டங்களுக்கு சகல விக்கெட்டுகளையும் இழந்தது.
அதிகபட்சமாக ஜோ ரூட் 160 ஓட்டங்களை அடித்து ஆட்டமிழந்தார்.
இதனை தொடர்ந்து அவுஸ்திரேலிய அணி தனது முதல் இன்னிங்சில் துடுப்பாட்டம் மேற்கொண்டு 10 விக்கெட் இழப்புக்கு 567 ஓட்டங்களை குவித்தது.
டிராவிஸ் ஹெட் 163 ஓட்டங்களையும், ஸ்டீவ் ஸ்மித் 138 ஓட்டங்களையும் அணி சார்பில் அதிகபடியாக பெற்றனர்.
பின்னர் 183 ஓட்டங்கள் பின் தங்கிய நிலையில் இரண்டாவது இன்னிங்ஸை ஆரம்பித்த இங்கிலாந்து அணியில் ஜேக்கப் பெத்தேல் சிறப்பாக விளையாடினார்.
தொடர்ந்து பொறுப்புடன் ஆடிய அவர் சதமடித்து அசத்தினார்.
ஏனைய வீரர்களில் டக்கெட் , ஹாரி புரூக் தலா 42 ஓட்டங்களை எடுத்தனர்.
இறுதியில் இங்கிலாந்து அணி 4 ஆவது நாள் முடிவில் 8 விக்கெட் இழப்பிற்கு 302 ஓட்டங்களை எடுத்து, 119 ரன்கள் முன்னிலை பெற்றது.
கடைசி நாள் இன்று ஆட்டம் தொடங்கி நடைபெற்றது.
சிறப்பாக விளையாடி வந்த பெத்தேல் 154 ஓட்டங்கள் எடுத்து ஆட்டமிழந்தார்.
இறுதியில் இங்கிலாந்து அணி இரண்டாவது இன்னிங்சில் 88.2 ஓவர்களில் 342 ஓட்டங்களுக்கு சகல விக்கெட்டுகளையும் இழந்தது.
இதன் மூலம் ஆஸ்திரேலிய அணிக்கு 160 ஓட்டங்கள் வெற்றி இலக்காக நிர்ணயம் செய்யப்பட்டது.
இந்த இலக்கை நோக்கி அவுஸ்திரேலிய அணி துடுப்பாட்டம் மேற்கொண்டது.
வெற்றி இலக்கை விரைவில் எட்டிவிட வேண்டும் என்ற நோக்கில் அவுஸ்திரேலிய அணியின் துடுப்பாட வீரர்கள் அனைவரும் விரைவாக ஓட்டங்களை சேர்க்கும் பணியில் ஈடுபட்டனர்.
இறுதியில் அவுஸ்திரேலிய அணி 31.2 ஓவர்களில் 5 விக்கெட் மட்டும் இழந்து இலக்கை கடந்தது.
இதன் மூலம் 5 விக்கெட்டுகள் வித்தியாசத்தில் அவுஸ்திரேலிய அணி வெற்றிபெற்றது.
அத்துடன் அந்த அணி 5 போட்டிகள் கொண்ட தொடரை 4-1 என்ற கணக்கில் கைப்பற்றி அசத்தியது.
போட்டியின் ஆட்டநாயகனாக டிராவிஸ் ஹெட் தெரிவானார், தொடரின் ஆட்டநாயகனாக மிட்செல் ஸ்டார்க் தெரிவானார்.
