ஹொங்கொங்கில் நடைபெறும் ஆசிய இளையோர் மெய்வல்லுநர் போட்டியில் பெண்களுக்கான 200 மீட்டரில் ரன்சினி பெரேரா தங்கப் பதக்கமும், ஆண்களுக்கான உயரப்பாய்தலில் தருஷ மெந்திஸ் வெள்ளிப் பதக்கமும், ஆண்களுக்கான 200 மீட்டரில் சதேவ் ராஜகருணா வெண்கலப் பதக்கமும் வென்று இலங்கை அணிக்கு முப்பெரும் பதக்கங்களைப் பெற்றுத் தந்துள்ளனர்.
அதன்படி, ஹொங்கொங்கில் நடைபெற்று வரும் 22-ஆவது ’20 வயதுக்குட்பட்ட ஆசிய இளையோர் மெய்வல்லுநர் விளையாட்டுப் போட்டிகளில்’ (Asian U20 Athletics Championships) இலங்கையைப் பிரதிநிதித்துவப்படுத்திய இளம் தடகள வீரர்கள் தங்கம், வெள்ளி மற்றும் வெண்கலப் பதக்கங்களை வென்று நாட்டிற்குப் பெருமை சேர்த்துள்ளனர்.
நேற்று (30) நடைபெற்ற பல்வேறு இறுதிப் போட்டிகளில் ,
பெண்களுக்கான 200 மீற்றர் ஓட்டப்போட்டியில் இலங்கையைப் பிரதிநிதித்துவப்படுத்திய ரன்சினி பெரேரா அதிரடி வெற்றியைப் பதிவு செய்துள்ளார்.
மிகவும் விறுவிறுப்பாக நடைபெற்ற இந்த இறுதிப் போட்டியில், இலக்கை 24.7 வினாடிகளில் கடந்து மிக நெருக்கமான போட்டி முடிவின் ஊடாக முதலிடத்தைப் பெற்று இலங்கைக்குத் தங்கப் பதக்கத்தை (Gold Medal) உறுதி செய்தார்.
ஆண்களுக்கான உயரப்பாய்தல் போட்டியில் களம் கண்ட இலங்கை வீரர் தருஷ மெந்திஸ் வெள்ளிப் பதக்கத்தை (Silver Medal) வென்றுள்ளார்.
இவர் போட்டியில் 2.14 மீற்றர் உயரத்தைத் தாண்டி இந்த சாதனையையும் பதக்கத்தையும் தனதாக்கிக் கொண்டதுடன் பலரும் சாதனைகளை பதிவுசெய்தனர்.
ஆண்களுக்கான 200 மீற்றர் ஓட்டப்போட்டியின் இறுதிப் போட்டியில் இலங்கையைப் பிரதிநிதித்துவப்படுத்தி சதேவ் ராஜகருணா மற்றும் ஓமெல் சில்வா ஆகிய இரு வீரர்கள் பங்கேற்றனர்.
இதில் பந்தய தூரத்தை 21.13 வினாடிகளில் நிறைவு செய்த சதேவ் ராஜகருணா இலங்கைக்கு வெண்கலப் பதக்கத்தைப் (Bronze Medal) பெற்றுக்கொடுத்தார்.
இதே போட்டியில் பங்கேற்ற மற்றொரு இலங்கை வீரரான ஓமெல் சில்வா மிகக் குறுகிய வினாடி வித்தியாசத்தில் பதக்க வாய்ப்பை இழந்து நான்காவது இடத்தைப் பெற்றார்.
ஆசிய அளவில் இளம் வீரர்களுக்காக நடைபெறும் இத்தொடரில் இலங்கை தடகளக் கூட்டணி அடுத்தடுத்து பதக்கங்களை வென்று வருகின்றமை விளையாட்டு ரசிகர்களிடையே பெரும் மகிழ்ச்சியை ஏற்படுத்தியுள்ளது.
