ஹார்முஸ் நீரிணையில் திங்களன்று (13) இரண்டு எண்ணெய் கப்பல்கள் மீது நடத்தப்பட்ட வெளிப்படையான தாக்குதலுக்கு ஈரான் தான் காரணம் என்று ஐக்கிய அரபு அமீரகம் குற்றம் சாட்டியுள்ளது.
இந்தத் தாக்குதலில் ஒருவர் உயிரிழந்ததுடன், எட்டுப் பேர் காயமடைந்தனர்.
அதேவேளையில், அந்த நீர்வழியின் மீதான புதிய முற்றுகை நடவடிக்கையின் ஒரு பகுதியாக அமெரிக்கா 20% கட்டணத்தை விதிக்கவுள்ளதாக ஜனாதிபதி டொனால்ட் ட்ரம்ப் தெரிவித்தார்.
இரு நாடுகளுக்கும் இடையே தாக்குதல்கள் தீவிரமடைந்து வரும் நிலையில், தொடர்ந்து மூன்றாவது இரவாகத் தாக்குதல்கள் நடத்தப்பட்டதையடுத்து, ஈரான் மீது மிகக் கடுமையான தாக்குதல்களை நடத்தி வருவதாக அமெரிக்க ஜனாதிபதி குறிப்பிட்டார்.
தடை விதிப்பது குறித்த அறிவிப்புக்கு பதிலளித்த ஈரானின் வெளிவிவகார அமைச்சர், ட்ரம்ப் பயன்படுத்திய அதே வார்த்தையான ‘பாதுகாவலன்’ (GUARDIAN) என்ற நிலையிலேயே தெஹ்ரான் அந்த நீரிணையின் விடயத்தில் தொடர்ந்து செயல்படும் என்று கூறினார்.
ஹார்முஸ் நீரிணையின் மீதான கட்டுப்பாடு குறித்த சர்ச்சை, அவர்களின் போரை முடிவுக்குக் கொண்டுவரும் முயற்சிகளைத் தடம் புரளச் செய்யும் அச்சுறுத்தலை ஏற்படுத்தியுள்ளது.
ஆனாலும் ஒரு உடன்பாடு இன்னும் சாத்தியம் என்று ட்ரம்ப் வலியுறுத்தினார்.
சர்வதேச நீர்வழிப்பாதை மீதான பதற்றம் அதிகரித்த நிலையில், ஈரானிய கப்பல் ஏவுகணைகள் இரண்டு தேசிய எண்ணெய்க் கப்பல்களைத் தாக்கியதில், ஒரு இந்தியக் கப்பல் ஊழியர் கொல்லப்பட்டதாகவும், மேலும் எட்டு பேர் காயமடைந்ததாகவும், அவர்களில் நால்வரின் நிலை கவலைக்கிடமாக இருப்பதாகவும் ஐக்கிய அரபு அமீரகம் திங்கள்கிழமை இரவு தெரிவித்தது.
காயமடைந்தவர்களில் ஆறு பேர் இந்தியர்கள், இருவர் உக்ரேனியர்கள் என்று ஐக்கிய அரபு அமீரகத்தின் பாதுகாப்பு அமைச்சு ‘எக்ஸ்’ (X) தளத்தில் வெளியிட்ட அறிக்கையில் சுட்டிக்காட்டியுள்ளது.
ஈரானின் இஸ்லாமியப் புரட்சிகரப் பாதுகாப்புப் படை (IRGC) பின்னர் டெலிகிராமிற்கு அனுப்பிய அறிக்கை மூலம் இந்தத் தாக்குதல்களை உறுதிப்படுத்தியது.
அதில், இரண்டு எண்ணெய்க் கப்பல்கள் எச்சரிக்கைகளைப் புறக்கணித்து, வழிசெலுத்தல் அமைப்புகளை அணைத்துவிட்டு, கண்ணிவெடிகள் பதிக்கப்பட்ட பாதை வழியாகச் செல்ல முயன்றன.
இதற்குப் பதிலளித்த இஸ்லாமியப் புரட்சிகரப் பாதுகாப்புப் படை எண்ணெய்க் கப்பல்களைத் தாக்கி அவற்றைச் செயலிழக்கச் செய்ததாகக் கூறியது.
கடந்த ஞாயிறு இரவு அப்பகுதியில் பரஸ்பர தாக்குதல்கள் நடத்தப்பட்டதைத் தொடர்ந்து, திங்களன்று அந்த நீர்வழியின் கட்டுப்பாட்டை மையமாகக் கொண்டு அமெரிக்கா மற்றும் ஈரானுக்கு இடையே மோதல் ஏற்பட்ட நிலையில், அந்த நீரிணை ஒரு முக்கிய பதற்றப் பகுதியாகத் தொடர்ந்து நீடிக்கிறது.
இந்த நிலையில், ‘ட்ரூத் சோஷியல்’ (Truth Social) தளத்தில் பதிவிட்ட ட்ரம்ப், ஈரானிய துறைமுகங்கள் மீதான கடற்படை முற்றுகையை அமெரிக்கா மீண்டும் அமுல்படுத்தவுள்ளதாகவும், ஹார்முஸ் நீரிணை வழியாகக் கொண்டு செல்லப்படும் அனைத்து சரக்குகள் மீதும் 20% கட்டணம் விதிக்கவுள்ளதாகவும் தெரிவித்தார்.
இது ஈரானின் கப்பல்கள் அல்லது வாடிக்கையாளர்கள் முக்கியமான எண்ணெய் போக்குவரத்துப் பாதையில் நுழைவதையோ அல்லது அதிலிருந்து வெளியேறுவதையோ தடுக்கும்.
ஆனால் ஏனைய அனைத்து நாடுகளும் அந்த நீரிணையை நியாயமாகவும் வெளிப்படையாகவும் பயன்படுத்தலாம் என்றும் ட்ரம்ப் கூறினார்.
இந்த முற்றுகை செவ்வாய்க்கிழமை (14) அன்று கிழக்கு நேரப்படி 16:00 மணி (GMT நேரம் 20:00 மணி) முதல் அமுலுக்கு வரும்.
மீண்டும் எகிறிய எண்ணெய் விலை
அமெரிக்கா மற்றும் ஈரானுக்கு இடையே மீண்டும் ஏற்பட்டுள்ள மோதல்கள் எரிசக்தி விநியோகம் குறித்த நிச்சயமற்ற தன்மையை அதிகரித்ததால், செவ்வாய்க்கிழமையன்று மசகு எண்ணெய் விலைகள் 2% உயர்ந்து கடந்த நான்கு வாரங்களில் இல்லாத அளவுக்கு உச்சத்தை எட்டின.
GMT நேரம் 00:51 நிலவரப்படி, பிரெண்ட் மசகு எண்ணெய் (Brent crude) விலை பீப்பாய்க்கு 1.68 டொலர் அல்லது 2% உயர்ந்து 84.98 டொலராகவும், அமெரிக்காவின் ‘வெஸ்ட் டெக்சாஸ் இன்டர்மீடியட்’ (WTI) மசகு எண்ணெய் விலை பீப்பாய்க்கு 1.65 டொலர்அல்லது 2.1% உயர்ந்து 79.79 டாலராகவும் இருந்தது.
முந்தைய வர்த்தக அமர்வில் பிரெண்ட் கச்சா எண்ணெய் விலை 9.6% உயர்ந்திருந்தது.
இது மே 2020-க்குப் பின்னர் காணப்பட்ட மிகப்பெரிய ஒரு நாள் விலை உயர்வாகும்.
