மேற்கிந்திய தீவுகள் மற்றும் பாகிஸ்தான் அணிகளுக்கிடையிலான இரண்டாவது டெஸ்ட் போட்டியின், நான்காம் நாள் ஆட்டம் நிறைவுக்கு வந்துள்ளது.
இதன்படி இரண்டாவது இன்னிங்ஸிற்காக துடுப்பெடுத்தாடி வரும் மேற்கிந்திய தீவுகள் அணி, நேற்றைய நான்காம் ஆட்டநேர முடிவில் 1 விக்கெட் இழப்புக்கு 49 ஓட்டங்களை பெற்றுள்ளது.
ஆட்டநேர முடிவில் களத்தில் கிரைஜ் பிரத்வெயிட் 17 ஓட்டங்களுடனும் அல்சார்ரி ஜோசப் 8 ஓட்டங்களுடனும் ஆட்டமிழக்காது களத்தில் உள்ளனர்.
ஜமைக்காவில் கடந்த வெள்ளிக்கிழமை ஆரம்பமான இப்போட்டியில், நாணய சுழற்சியில் வெற்றிபெற்ற மேற்கிந்திய தீவுகள் அணி முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய பாகிஸ்தான் அணி, 302 ஓட்டங்களை பெற்றிருந்த போது தனது முதல் இன்னிங்ஸ் ஆட்டத்தை இடைநிறுத்திக்கொண்டது.
இதன்போது அணியின் அதிகப்பட்ச ஓட்டங்களாக, பவாட் அலாம் ஆட்டமிழக்காது 124 ஓட்டங்களையும் பாபர் அசாம் 75 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணியின் பந்துவீச்சில், கெமார் ரோச் மற்றும் ஜெய்டன் சீல்ஸ் ஆகியோர் தலா 3 விக்கெட்டுகளையும் ஜேஸன் ஹோல்டர் 2 விக்கெட்டுகளையும் வீழ்த்தினர்.
இதனைத்தொடர்ந்து பதிலுக்கு முதல் இன்னிங்சை தொடங்கிய மேற்கிந்திய தீவுகள் அணி 150 ஓட்டங்களுக்கு சுருண்டது.
இதில் அணியின் அதிகப்பட்ச ஓட்டங்களாக, போனர் 37 ஓட்டங்களையும் பிளக்வுட் 33 ஓட்டங்களையும் பெற்றுக்கொண்டனர்.
பாகிஸ்தான் அணியின் பந்துவீச்சில், ஷாயின் ஷா அப்ரிடி 6 விக்கெட்டுகளையும் மொஹமட் அப்பாஸ் 3 விக்கெட்டுகளையும் பஷிம் அஸ்ரப் 1 விக்கெட்டினையும் வீழ்த்தினர்.
இதனையடுத்து 152 ஓட்டங்கள் முன்னிலையில் தனது இரண்டாவது இன்னிங்சை தொடங்கிய பாகிஸ்தான் அணி, 6 விக்கெட்டுகள் இழப்புக்கு 176 ஓட்டங்களை பெற்றிருந்த போது தனது இரண்டாவது இன்னிங்ஸ் ஆட்டத்தை இடைநிறுத்திக்கொண்டது. இதனால் மேற்கிந்திய தீவுகள் அணிக்கு 329 ஓட்டங்கள் வெற்றி இலக்காக நிர்ணயிக்கப்பட்டது.
இதன்போது பாகிஸ்தான் அணி சார்பில், அதிகப்பட்ச ஓட்டங்களாக இம்ரான் பட் 37 ஓட்டங்களையும் பாபர் அசாம் 33 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணியின் பந்துவீச்சில், ஜேஸன் ஹோல்டர் மற்றும் அல்சார்ரி ஜோசப் ஆகியோர் தலா 2 விக்கெட்டுகளையும் மேயர்ஸ் மற்றும் பிரத்வெயிட் ஆகியோர் தலா 1 விக்கெட்டினையும் வீழ்த்தினர்.
இதன்பிறகு 329 ஓட்டங்கள் என்ற வெற்றி இலக்கை நோக்கி பதிலுக்கு களமிறங்கிய மேற்கிந்திய தீவுகள் அணி, நேற்றைய நான்காம் ஆட்டநேர முடிவில் 1 விக்கெட் இழப்புக்கு 49 ஓட்டங்களை பெற்றது.
இன்னமும் ஒருநாள் மற்றும் 9 விக்கெட்டுகள் வசமுள்ள நிலையில், போட்டியின் இறுதிநாளான இன்று மேற்கிந்திய தீவுகள் அணி துடுப்பெடுத்தாடவுள்ளது.
