மோட்டோ ஜிபி பந்தயத்தின் அமெரிக்காஸ் கிராண்ட் பிரிக்ஸ் சுற்றில், டுகார்டி அணியின் எனே பாஸ்டியாநினி சம்பியன் பட்டம் வென்றுள்ளார்.
இளசுகளின் விருப்ப விளையாட்டாக இரசிக்கப்படும் மோட்டோ ஜிபி பந்தயம் நடப்பு ஆண்டு 21 சுற்றுகளாக பல்வேறு நாடுகளில் நடைபெறுகின்றது.
அந்த வகையில் ஆண்டின் நான்காவது சுற்றான அமெரிக்காஸ் கிராண்ட் பிரிக்ஸ், அமெரிக்காஸ் சர்வதேச ஓடுதளத்தில் நடைபெற்றது.
இதில் 110.3 கிலோ மீற்றர் பந்தய தூரத்தை நோக்கி, 24 வீரர்கள் மோட்டார் சைக்கிள்களில் சீறிபாய்ந்தனர்.
இதில், டுகார்டி அணியின் எனே பாஸ்டியாநினி, பந்தய தூரத்தை 41 நிமிடங்கள், 23.111 வினாடிகளில் கடந்து முதலிடத்தை பிடித்தார். அத்தோடு முதலிடத்திற்கான 25 புள்ளிகளையும் அவர் பெற்றுக் கொண்டார்.
இதையடுத்து, சூசுக்கி அணியின் அலெக்ஸ் ரின்ஸ், 2.058 செக்கன்கள் பின்னிலையில் பந்தய தூரத்தை கடந்து இரண்டாவது இடத்தை பிடித்ததோடு, அதற்கான 20 புள்ளிகளையும் பெற்றுக்கொண்டார்.
இவரையடுத்து, டுகார்டி அணியின் ஜெக் மில்லர் 2.312 செக்கன்கள் பின்னிலையில் பந்தய தூரத்தை கடந்து மூன்றாவது இடத்தை பிடித்தார். அதற்கான 16 புள்ளிகளையும் அவர் பெற்றுக்கொண்டார்.
இதுவரை நடந்து முடிந்துள்ள நான்கு சுற்றுப் போட்டிகளின் அடிப்படையில், டுகார்டி அணியின் எனே பாஸ்டியாநினி, இரண்டு சம்பியன் பட்டங்களுடன் 61 புள்ளிகளுடன் முதலிடத்தில் உள்ளார்.
சூசுக்கி அணியின் அலெக்ஸ் ரின்ஸ், 56 புள்ளிகளுடன் இரண்டாவது இடத்திலும், அப்ரில்லா அணியின் அலிக்ஸ் எஸ்பர்காரோ ஒரு சம்பியன் பட்டத்துடன் 50 புள்ளிகளுடன் மூன்றாவது இடத்திலும் உள்ளனர்.
ஐந்தாவது சுற்றான போர்த்துகல் கிராண்ட் பிரிக்ஸ், எதிர்வரும் 24ஆம் திகதி அல்கர்வ் சர்வதேச ஓடுதளத்தில் நடைபெறவுள்ளது.
