ஜனாதிபதியை தேர்ந்தெடுப்பதற்கான தேர்தலில் பதிவான வாக்குகளை எண்ணும் பணி இன்று ஆரம்பமாகியுள்ளது.
பலத்த பாதுகாப்புடன் இன்று காலை 11 மணிக்கு ஆரம்பமாகிய இந்த வாக்கு எண்ணிக்கையில், முதலில் நாடாளுமன்ற உறுப்பினர்களின் வாக்குகள் எண்ணப்படுகின்றன.
இந்த சுற்று முடிவடைந்ததும் வேட்பாளர்களின் முன்னணி நிலவரம் வெளியிடப்படும்.
பின்னர் ஆங்கில எழுத்து அகர வரிசைப்படி மாநிலங்களின் வாக்குப்பெட்டிகள் திறந்து எண்ணப்படும்.
இதில் முதல் 10 மாநிலங்களின் வாக்குகள் எண்ணப்பட்டதும், இரண்டாவது முறையாக வேட்பாளர்களின் முன்னணி நிலவரம் வெளியிடப்படும்.
தொடர்ந்து 20 மாநிலங்கள் முடித்த பின் ஒரு முறையும், பின்னர் மீதமுள்ள வாக்குகள் எண்ணி முடிக்கப்பட்ட பின் இறுதி நிலவரத்தையும், தேர்தல் நடத்தும் அதிகாரி பி.சி.மோடி வெளியிடுவார் என அறிவிக்கப்பட்டுள்ளது.
கடந்த 18ஆம் திகதி காலை 10 மணி முதல் மாலை 5 மணி வரை ஜனாதிபதி தேர்தலுக்கான வாக்குப்பதிவு நடந்தது.
776 நாடாளுமன்ற உறுப்பினர்கள் உட்பட 4 ஆயிரத்து 800க்கு மேற்பட்ட மக்கள் பிரதிநிதிகள் இந்த தேர்தலில் வாக்களிக்க தகுதியுள்ளவர்களாக அறிவிக்கப்பட்டிருந்தனர். இதில் 99 சதவீதத்தினர் வாக்களித்திருந்தனர்.
இந்த தேர்தலில் பா.ஜ.க. வேட்பாளர் திரவுபதி முர்முவுக்கும், எதிர்க்கட்சிகளின் பொது வேட்பாளர் யஷ்வந்த் சின்காவுக்கும் இடையேதான் போட்டி நிலவியது.
நாட்டின் 15ஆவது ஜனாதிபதி யார்? என்ற விபரம் இன்றைய தினம், மாலைக்குள் வெளியாகும் என தேர்தல் ஆணையக வட்டாரங்கள் தெரிவித்துள்ளன.
திரவுபதி முர்முவே அடுத்த ஜனாதிபதி ஆகும் வாய்ப்பு இருப்பதாக கூறப்படுகிறது. அவ்வாறு அவர் வெற்றி பெற்றால் நாட்டின் முதல் பழங்குடியின ஜனாதிபதி என்ற சிறப்பை அவர் பெறுவார் என்பது குறிப்பிடத்தக்கது.
