அமெரிக்க நாடாளுமன்ற பிரதிநிதிகள் சபை (கீழவை) தலைவர் நான்சி பெலோசி தாய்வானுக்கு பயணம் மேற்கொண்டு 12 நாட்களே ஆன நிலையில், அமெரிக்க மேலவை உறுப்பினரான ஜனநாயக கட்சியின் எட் மார்கே தலைமையில் 5 நாடாளுமன்ற உறுப்பினர்கள் குழு மீண்டும் தாய்வானுக்கு சென்றுள்ளது.
நேற்று (ஞாயிற்றுக்கிழமை) தைபே விமான நிலையத்தில் அமெரிக்க அரசாங்கா விமானம் வந்திறங்கிய காட்சிகளை தாய்வான் தொலைக்காட்சி வெளியிட்டுள்ளது.
ஆசிய பயணத்தின் ஒரு பகுதியாக வந்துள்ள அமெரிக்க நாடாளுமன்ற உறுப்பினர்கள் குழு, 2 நாட்ள் சுற்றுப்பயணம் மேற்கொள்ளவிருக்கிறது.
இதன்போது, இருதரப்பு உறவுகள், பிராந்திய பாதுகாப்பு, வர்த்தகம், முதலீடு உள்ளிட்ட விவகாரங்கள் குறித்து தாய்வான் தலைவர்களுடன் நாடாளுமன்ற உறுப்பினர்கள் பேச்சுவார்த்தை நடத்துவர் என்று அங்குள்ள அதிகாரபூர்வமில்லாத அமெரிக்க தூதரகம் தரப்பில் தெரிவிக்கப்பட்டுள்ளது.
நாடாளுமன்ற உறுப்பினர்கள் குழுவின் வருகையால், சீனா-அமெரிக்கா இடையிலான மோதல்போக்கு மேலும் அதிகரிக்கும் என்று சர்வதேச பார்வையாளர்கள் கருதுகின்றனர்.
இதனிடையே, தாய்வான் நீரிணை பகுதியில் நேற்று 10 போர் விமானங்கள் உட்பட சீன இராணுவத்தின் 22 விமானங்கள், 6 கடற்படை கப்பல்களின் நடமாட்டம் கண்டறியப்பட்டதாக தாய்வான் பாதுகாப்பு அமைச்சகம் டுவிட்டரில் பதிவிட்டுள்ளது.
சீன உள்நாட்டுப் போருக்குப் பிறகு தனி நாடாக செயற்பட்டு வரும் தாய்வான் தீவை தங்கள் நாட்டின் ஓர் அங்கமாக (பிராந்தியமாக) சீனா உரிமை கொண்டாடி வருகிறது. ஆகையால், தாய்வானுக்கு எந்த நாட்டின் தலைவரும் அலுவல்பூர்வமாக செல்வதை சீனா எதிர்த்து வருகிறது.
இந்தச் சூழலில், நான்சி பெலோசியின் அண்மைய பயணத்தால் கடும் கோபமடைந்த சீனா,தாய்வானைச் சுற்றியுள்ள கடல் பகுதிக்கு ஏவுகணைகள், போர்க் கப்பல்கள், போர் விமானங்களை அனுப்பி, வான்வழியாகவும் கடல் வழியாகவும் போர்ப் பயிற்சியில் ஈடுபட்டமை குறிப்பிடத்தக்கது.
