லங்கா பிரீமியர் லீக்: லைக்கா ஜப்னா கிங்ஸ் அணி சிறப்பான வெற்றி!

லங்கா பிரீமியர் லீக் ரி-20 தொடரின், 17ஆவது லீக் போட்டியில், லைக்கா ஜப்னா கிங்ஸ் அணி 16 ஓட்டங்கள் வித்தியாசத்தில் வெற்றிபெற்றது.

ஆர்.பிரேமதாஸ மைதானத்தில் நேற்று (ஞாயிற்றுக்கிழமை) நடைபெற்ற இப்போட்டியில், லைக்கா ஜப்னா கிங்ஸ் அணியும் காலி க்ளேடியேட்டர்ஸ் அணியும் பலப்பரீட்சை நடத்தின.

இப்போட்டியில் நாணய சுழற்சியில் வெற்றிபெற்ற லைக்கா ஜப்னா கிங்ஸ் அணி, முதலில் துடுப்பெடுத்தாட தீர்மானித்தது.

இதன்படி, முதலில் துடுப்பெடுத்தாடிய லைக்கா ஜப்னா கிங்ஸ் அணி, நிர்ணயிக்கப்பட்ட 20 ஓவர்கள் நிறைவில் 8 விக்கெட்டுகள் இழப்புக்கு 170 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, அபீப் ஹொசைன் 54 ஓட்டங்களையும் சமரவிக்கிரம 32 ஓட்டங்களையும் பெற்றுக்கொண்டனர்.

காலி க்ளேடியேட்டர்ஸ் அணியின் பந்துவீச்சில், ரியாஸ் 3 விக்கெட்டுகளையும் நுவான் துசார 2 விக்கெட்டுகளையும் நுவான் பிரதீப் 1 விக்கெட்டினையும் வீழ்த்தினர்.

இதனைத்தொடர்ந்து 171 என்ற வெற்றி இலக்கை நோக்கி பதிலுக்கு களமிறங்கிய காலி க்ளேடியேட்டர்ஸ் அணியால், 20 ஓவர்கள் நிறைவில் 9 விக்கெட்டுகள் இழப்புக்கு 154 ஓட்டங்களை மட்டுமே பெற முடிந்தது. இதனால், லைக்கா ஜப்னா கிங்ஸ் அணி 16 ஓட்டங்கள் வித்தியாசத்தில் வெற்றிபெற்றது.

இதன்போது அணியின் அதிகப்பட்ச ஓட்டங்களாக, குசல் மெண்டிஸ் 58 ஓட்டங்களையும் இப்தீகார் அஹமட் 23 ஓட்டங்களையும் பெற்றுக்கொண்டனர்.

லைக்கா ஜப்னா கிங்ஸ் அணியின் பந்துவீச்சில், பினுர பெணார்டோ 3 விக்கெட்டுகளையும் ஜேம்ஸ் புல்லர் மற்றும் வியாஸ்காந்த் ஆகியோர் தலா 2 விக்கெட்டுகளையும் மகேஷ் தீக்ஷன 1 விக்கெட்டினையும் வீழ்த்தினர்.

இப்போட்டியின் ஆட்டநாயகனாக, 35 பந்துகளில் 1 சிக்ஸர் 5 பவுண்ரிகள் அடங்களாக, 54 ஓட்டங்களை பெற்றுக்கொண்ட அபீப் ஹொசைன் தெரிவுசெய்யப்பட்டார்.