நியூஸிலாந்து மற்றும் இங்கிலாந்து அணிகளுக்கிடையிலான முதலாவது டெஸ்ட் போட்டியின், மூன்றாம்நாள் ஆட்டம் நிறைவுக்கு வந்துள்ளது.
இதன்படி இரண்டாவது இன்னிங்ஸிற்காக துடுப்பெடுத்தாடிவரும் நியூஸிலாந்து அணி, இன்றைய மூன்றாம்நாள் ஆட்டநேர முடிவில், 5 விக்கெட்டுகள் இழப்புக்கு 63 ஓட்டங்களை பெற்றுள்ளது.
ஆட்டநேர முடிவில், டேரில் மிட்செல் 13 ஓட்டங்களுடனும் பிரேஸ்வெல் 25 ஓட்டங்களுடனும் களத்தில் உள்ளனர்.
இதற்கமைய, இங்கிலாந்துக் கிரிக்கெட் அணியின் 394 ஓட்டங்கள் என்ற வெற்றி இலக்குடன் ஒப்பிடுகையில், நியூஸிலாந்து அணி, 331 ஓட்டங்கள் பின்னிலையில் உள்ளது.
மவுன்ட் மவுங்கானுய் மைதானத்தில் நேற்று முன் தினம் (வியாழக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற நியூஸிலாந்து அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய இங்கிலாந்து அணி, முதல் இன்னிங்ஸிற்காக 9 விக்கெட்டுகள் இழப்புக்கு 325 ஓட்டங்களை பெற்றிருந்த போது, தனது முதல் இன்னிங்ஸ் ஆட்டத்தை இடைநிறுத்திக்கொண்டது.
இதன்போது அணியின் அதிகப்பட்ச ஓட்டங்களாக, ஹரி புரூக் 89 ஓட்டங்களையும் பென் டக்கெட் 84 ஓட்டங்களையும் பெற்றுக்கொண்டனர்.
நியூஸிலாந்துக் கிரிக்கெட் அணியின் பந்துவீச்சில், நெய்ல் வாக்னர் 4 விக்கெட்டுகளையும் டிம் சவுத்தீ மற்றும் ஸ்கொட் குகெலீஜ்ன் ஆகியோர் தலா 2 விக்கெட்டுகளையும் பிளெயர் டிக்னர் 1 விக்கெட்டினையும் வீழ்த்தினர்.
இதனைத்தொடர்ந்து பதிலுக்கு முதல் இன்னிங்சை தொடங்கிய நியூஸிலாந்து அணி, 306 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, டொம் பிளெண்டல் 138 ஓட்டங்களையும் கோன்வே 77 ஓட்டங்களையும் பெற்றுக்கொண்டனர்.
இங்கிலாந்துக் கிரிக்கெட் அணியின் பந்துவீச்சில், ரொபின்சன் 4 விக்கெட்டுகளையும் ஜேம்ஸ் ஆண்டர்சன் 3 விக்கெட்டுகளையும் பிரோட், ஜெக் லீச் மற்றும் ஸ்டோக்ஸ் ஆகியோர் தலா 1 விக்கெட்டினையும் வீழ்த்தினர்.
இதனையடுத்து 19 ஓட்டங்கள் பின்னிலையில் தனது இரண்டாவது இன்னிங்ஸ் ஆட்டத்தை தொடங்கிய இங்கிலாந்து அணி, 374 ஓட்டங்களை பெற்றுக்கொண்டது. இதற்கமைய இங்கிலாந்து அணி, நியூஸிலாந்து அணிக்கு 394 ஓட்டங்களை வெற்றி இலக்காக நிர்ணயித்தது.
இதன்போது அணியின் அதிகப்பட்ச ஓட்டங்களாக, ஜோ ரூட் 57 ஓட்டங்களையும் ஹரி புரூக் 54 ஓட்டங்களையும் பென் போக்ஸ் 51 ஓட்டங்களையும் பெற்றுக்கொண்டனர்.
நியூஸிலாந்துக் கிரிக்கெட் அணியின் பந்துவீச்சில், மைக்கேல் பிரெஸ்வல் மற்றும் பிளாயர் டிக்னர் ஆகியோர் தலா 3 விக்கெட்டுகளையும் நெய்ல் வாக்னர் மற்றும் ஸ்காட் குகெலிஜ்ன் ஆகியோர் தலா 2 விக்கெட்டுகளையும் வீழ்த்தினர்.
இதனைத்தொடர்ந்து 394 என்ற வெற்றி இலக்கை நோக்கி பதிலுக்கு இரண்டாவது இன்னிங்சை தொடங்கிய நியூஸிலாந்து அணி, இன்றைய மூன்றாம்நாள் ஆட்டநேர முடிவில், 5 விக்கெட்டுகள் இழப்புக்கு 63 ஓட்டங்களை பெற்றுள்ளது.
இன்னமும் 5 விக்கெட்டுகள் வசமுள்ள நிலையில், போட்டியின் நான்காம் நாள் ஆட்டத்தை நியூஸிலாந்து அணி, நாளை தொடரவுள்ளது.
