பாகிஸ்தானில் நேற்று முன்தினம் (17) இடம்பெற்ற பஸ் விபத்தொன்றில் சிக்கி 13 பேர் உயிரிழந்துள்ளனர் எனத் தெரிவிக்கப்பட்டுள்ளது.
பாகிஸ்தானின் தலைநகர் இஸ்லாமாபாத்தில் இருந்து லாகூரை நோக்கிப் பயணித்த பஸ்ஸொன்றே ,இவ்வாறு கல்லார் கஹார் நெடுஞ்சாலையில் வைத்து வேகக் கட்டுப்பாட்டை இழந்து, கவிழ்ந்து விபத்துக்குள்ளாகியுள்ளது.
இவ்விபத்தில் குழந்தைகள் உட்பட 13 பேர் உயிரிழந்துள்ளனர் எனவும் 25 பேர் படுகாயமடைந்த நிலையில் வைத்தியசாலையில் சிகிச்சை பெற்று வருகின்றனர் எனவும் தெரிவிக்கப்பட்டுள்ளது.
இந்நிலையில் பஸ்ஸின் பிரேக் செயலிழந்தமையே இவ்விபத்துக்கான காரணமென முதற்கட்ட விசாரணையில் இருந்து தெரியவந்துள்ளது.
கிரீஸில் கடந்த 14 ஆம் திகதி இடம்பெற்ற படகு விபத்தில் 298 பாகிஸ்தானியர்கள் உயிரிழந்த சம்பவம் அந்நாட்டு மக்கள் மத்தியில் சோகத்தை ஏற்படுத்தியிருந்த நிலையில், இப்பஸ் விபத்தில் 13 பேர் உயிரிழந்துள்ளமை அந்நாட்டு மக்கள் மத்தியில் மேலும் சோகத்தை ஏற்படுத்தியுள்ளது.
