வடமாகாண ரீதியாக டெங்கு பரவலைக் கட்டுப்படுத்தும் சுத்திகரிப்பு பணியை மேற்கொள்ளும் ஊழியர்கள் இன்று கவனயீர்ப்புப் போராட்டம் ஒன்றினை முன்னெடுத்துள்ளனர்.
யாழ் மாவட்டச் செயலகம் முன்பாக மற்றும் வடக்கு மாகாண ஆளுநர் அலுவலகத்துக்கு முன்பாகவும் இடம்பெற்ற குறித்த கவனயீர்ப்பு போராட்டத்தில் சம்பள உயர்வைக் கோரியும் நிரந்தர நியமனத்தை வழங்குமாறும் வலியுறுத்திப் போராட்டம் முன்னெடுக்கப்பட்டது.
போராட்டத்தின் பின்னர் வடக்கு மாகாண ஆளுநருக்கான கடிதம் வடக்கு மாகாண ஆளுநரின் செயலாளர் பொன்னம்பலம் வாகிசனிடம் கையளிக்கப்பட்டது.
ஏழு வருடங்களுக்கு மேலாக டெங்கு நோயை கட்டுப்படுத்தும் குறித்த பணியை முன்னெடுத்துவரும் தமக்கு இதுவரையும் நிரந்தர நியமனம் வழங்கப்படவில்லை என்றும் தமக்கான ஊதியம் 22,000 வரையே கொடுக்கப்படுகிறது எனவும் இதனைக் கொண்டு தமது வாழ்வாதாரத்தினை கொண்டு செல்ல முடியாத நிலையில் உள்ளமையினால் உரிய அதிகாரிகள் தமது ஊதியம் தொடர்பான கோரிக்கையினையும் நிரந்தர நியமனம் தொடர்பான கோரிக்கையினையும் நிறைவேற்ற வேண்டும் என இதன்போது போராட்டக்காரர்கள் கேட்டுக் கொண்டனர்.
