யாழ்ப்பாணம் – வட்டுக்கோட்டையில் பொலிஸாரின் சித்திரவதைக்கு உள்ளான இளைஞர் ஒருவர் உயிரிழந்துள்ளார் எனத் தெரிவிக்கப்பட்டுள்ளது.
யாழ் சிறைச்சாலையில் விளக்கமறியலில் வைக்கப்பட்டிருந்த சித்தங்கேணி பகுதியை சேர்ந்த 26 வயதான இளைஞரே வைத்திய சாலையில் சிகிச்சை பெற்று வந்த நிலையில் நேற்று(19) உயிரிழந்துள்ளார்.
இந்நிலையில் ”பொலிஸார் மேற்கொண்ட கடுமையான தாக்குதலினாலேயே குறித்த இளைஞர் உயிரிழந்துள்ளார்” என அவரது உறவினர்கள் குற்றம் சுமத்தியுள்ளனர்.
இதேவேளை ”பொலிஸார் தன்னை எவ்வாறு சித்திரவதை செய்தார்கள் என்பது தொடர்பில் குறித்த இளைஞர் உயிரிழப்பதற்கு முன்னர் பதிவுசெய்த வீடியோவொன்றும் தற்போது இணையத்தில் வைரலாகி வருகின்றது.
இந்நிலையில் குறித்த சம்பவம் தொடர்பில் விசாரணைகளை முன்னெடுக்க யாழ்ப்பாணம் உதவிப் பொலிஸ் அத்தியட்சகர் தலைமையில் பொலிஸ் அதிகாரிகள் குழு நியமிக்கப்பட்டுள்ளதாகத் தெரிவிக்கப்பட்டுள்ளது.
அத்துடன் விசாரணைக்கு ஏதுவாக உடன் அமுலுக்கு வரும் வகையில் , வட்டுக்கோட்டை பொலிஸ் நிலையத்தில் கடமையாற்றி வந்த இருபொலிஸ் உத்தியோகஸ்தர்களுக்கும் இடமாற்றம் வழங்கப்பட்டுள்ளதாகவும் தெரிவிக்கப்பட்டுள்ளது.
இந்நிலையில் குறித்த இளைஞனின் சடலம் இன்று(20) யாழ்.போதனா வைத்தியசாலையில் உடற்கூற்று பரிசோதனைக்கு உட்படுத்தப்படவுள்ளமை குறிப்பிடத்தக்கது
