இலங்கை – ஆப்கானிஸ்தான் அணிகளுக்கிடையிலான ஒருநாள் தொடர் பல்லேகலவுக்கு மாற்றம்!

இலங்கை மற்றும் ஆப்கானிஸ்தான் அணிகளுக்கிடையிலான ஒருநாள் தொடர் வேறொரு மைதானத்துக்கு மாற்றப்பட்டுள்ளதாக, இலங்கை கிரிக்கெட் நிறுவனம் அறிவித்துள்ளது.

ஆப்கானிஸ்தான் கிரிக்கெட் அணி, மூன்று வகை கிரிக்கெட் போட்டிகளிலும் விளையாடுவதற்காக இலங்கைக்கு அடுத்த மாதம் கிரிக்கெட் சுற்றுப்பயணம் மேற்கொள்ளவுள்ளது.

இதன் போட்டி அட்டவணையை இலங்கை கிரிக்கெட் நிறுவனம் முன்னதாக அறிவித்திருந்த போதும், தற்போது அதில் மாற்றம் மேற்கொள்ளப்பட்டுள்ளது.

முன்னதாக மூன்று போட்டிகள் கொண்ட ஒருநாள் தொடர், கொழும்பு ஆர். பிரேமதாஸ மைதானத்தில் நடைபெறுவதாக இருந்தது. ஆனால், இப்போட்டி தொடர் தற்போது, கண்டி- பல்லேகல மைதானத்திற்கு மாற்றப்பட்டுள்ளது.

எனினும், ஒரேயொரு டெஸ்ட் போட்டி கொழும்பு- எஸ்.எஸ்.சி. மைதானத்திலும் மூன்று போட்டிகள் கொண்ட ரி-20 தொடர் தம்புள்ளை- ரன்கிரி மைதானத்திலும் நடைபெறவுள்ளது.

எதிர்வரும் பெப்ரவரி மாதம் 2ஆம் திகதி கொழும்பு- எஸ்.எஸ்.சி. மைதானத்தில் ஆரம்பமாகவுள்ள ஒரேயொரு டெஸ்ட் போட்டியுடன் இத்தொடர் ஆரம்பமாகவுள்ளது.