கொழும்பில் இருந்து யாழ்ப்பாணம் வந்து, பொலிஸ் நிலையத்தில் தஞ்சமடைந்த சிறுவன் மீள அவனது தாயாரிடம் ஒப்படைக்கப்பட்டுள்ளான்.
கொழும்பில் இருந்து யாழ்ப்பாணம் வந்த சிறுவனொருவன், தனது தாய் மற்றும் தாயின் இரண்டாவது கணவர் ஆகியோர் தன்னை அடித்து சித்திரவதை புரிவதாகக் கூறி யாழ் பொலிஸ் நிலையத்தில் தஞ்சமடைந்திருந்தான்.
சிறுவன் தொடர்பில் விசாரணைகளை முன்னெடுத்த போது , சிறுவன் வடஇந்தியாவை சேர்ந்தவன் எனவும் , அவனது தாயார் கொழும்பிலுள்ள கஸினோவொன்றில் பணிபுந்து வருவதாகவும், இங்கு இலங்கையைச் சேர்ந்த நபருடன் தங்கி வசித்து வருவதாகவும் தெரிய வந்துள்ளது.
அதேவேளை , சிறுவன் மன்னார் சென்று அங்கிருந்து கடல் வழியாக இந்தியா செல்வதற்கு திட்டமிட்டு , கொழும்பில் இருந்து வெளியேறி மன்னார் பேருந்தில் ஏறுவதற்குப் பதிலாக யாழ் பேருந்தில் ஏறி யாழ்ப்பாணத்தை வந்தடைந்துள்ளார் எனத் தெரிய வந்துள்ளது.
இதனையடுத்து எங்கே செல்வதெனத் தெரியாமல் பொலிஸ் நிலையத்தில் சிறுவன் தஞ்சமடைந்துள்ளார் எனத் தெரிவிக்கப்படுகின்றது.
இந்நிலையில் சிறுவனின் தாயை பொலிஸார் யாழ்ப்பாணம் அழைத்து விசாரணை செய்த வேளை சிறுவன் செய்யும் தவறுகளுக்கு தான் சிறுவனை தண்டிப்பதாகக் கூறியுள்ளார்.
இதனை அடுத்து சிறுவனை சமரசப்படுத்தி, தாயாரையும் எச்சரித்த பொலிஸார் , சிறுவனை தாயாருடன் கொழும்புக்கு அனுப்பி வைத்துள்ளதாகத் தெரிவிக்கப்பட்டுள்ளது.
