கடந்த மாதம் 10 ஆம் திகதி நெடுந்தீவு கடற்பரப்பிற்கு அண்மையில் அத்துமீறி மீன்பிடியில் ஈடுபட்ட குற்றச்சாட்டில், கடற்படையினரால் கைதுசெய்யப்பட்ட இந்திய மீனவர்கள் 23 பேருக்கும் ஒத்திவைக்கப்பட்ட சிறைதண்டனை விதித்து நீதிமன்றம் தீர்ப்பளித்துள்ளது.
குறித்த 23 பேரும், இன்று யாழ். ஊர்காவற்றுறை நீதவான் நீதிமன்றில் சிறைச்சாலை அதிகாரிகளினால் நீதவான் நளின சுபாஸ்கரன் முன்னிலையில் முற்படுத்தப்படுத்தப்பட்டனர்.
வழக்கினை ஆராய்ந்த நீதவான் இந்திய மீனவர்கள் 23 பேருக்கும் 6 வருடங்களுக்கு ஒத்திவைக்கப்பட்ட 2 வருடங்கள் சிறைத்தண்டனை வழங்கி தீர்ப்பளித்தார்.
அத்துடன் குறித்த 23 பேரில் 3 பேர் படகோட்டிகள் என்றமையால், அவர்களுக்கு தலா 4 மில்லியன் அபராத தொகை மற்றும் 6 மாத சிறைத்தண்டனையும் வழங்கி உத்தரவிட்டார்.
மேலும் அபராத தொகை செலுத்த தவறின் 6 மாதங்கள் சிறைத்தண்டனைக்கு மேலதிகமாக 3 மாத சிறைத்தண்டனை அனுபவிக்கவேண்டும் எனவும் தீர்ப்பளித்துள்ளார்.
