மெலிசா சூறாவளி செவ்வாயன்று (28) ஜமைக்காவை பேரழிவு தரும் 5 ஆம் வகை புயலாகத் தாக்கும் என்று எதிர்பார்க்கப்படுகிறது.
இது 174 ஆண்டுகளுக்கு முன்பு பதிவு செய்தல் தொடங்கியதிலிருந்து தீவைத் தாக்கும் வலிமையான புயலாக தற்சமயம் மாறியுள்ளது.
இந்த புயல் உள்ளூர் நேரப்படி செவ்வாய்க்கிழமை (28) அதிகாலை கரையைக் கடக்கும் என்றும், தீவு முழுவதும் குறுக்காகப் பிரிந்து, தெற்கில் உள்ள செயிண்ட் எலிசபெத் திருச்சபைக்கு அருகில் நுழைந்து வடக்கில் உள்ள செயிண்ட் ஆன் திருச்சபையைச் சுற்றி வெளியேறும் என்றும் வானிலை முன்னறிவிப்பாளர்கள் தெரிவித்தனர்.
புயல் ஏற்படுவதற்கு சில மணி நேரங்களுக்கு முன்பு, பேரழிவு தரும் சேதம் குறித்து எச்சரிக்கப்பட்டுள்ளதால், தன்னால் முடிந்த அனைத்து முன்னெச்சரிக்கை நடவடிக்கையினையும் எடுத்துள்ளதாக ஜமைக்கா அரசாங்கம் தெரிவித்துள்ளது.
புயலுக்கு முன்னதாக நிலச்சரிவுகள், மற்றும் மரங்கள் முறிந்து வீழ்ந்தமையினால் தீவின் பல பகுதிகளில் மின்வெட்டு சம்பவங்களும் பதிவாகியுள்ளன.
தெற்கு ஜமைக்காவில் 13 அடி (4 மீட்டர்) உயரத்திற்கு ஆபத்தான கடல் அலைகள் எழும்பும் என்று எதிர்பார்க்கப்படுகிறது.
மேலும் கடற்கரையோரத்தில் உள்ள சில மருத்துவமனைகளில் ஏற்படும் பாதிப்பு குறித்து அதிகாரிகள் கவலை கொண்டுள்ளனர்.
சில நோயாளிகள் தரை தளத்திலிருந்து இரண்டாவது தளத்திற்கு மாற்றப்பட்டதாகவும் அந் நாடு சுகாதார அமைச்சு தெரிவித்துள்ளது.
புயல் காரணமாக கரீபியனில் ஏழு பேர் உயிரிழந்துள்ளதாகவும் கூறப்படுகிறது.
இதில் ஜமைக்காவில் மூன்று பேர், ஹைட்டியில் மூன்று பேர் மற்றும் டொமினிகன் குடியரசில் ஒருவர் உயிரிழந்துள்ளார்.
அங்கு மற்றொருவர் காணாமல் போயுள்ளார்.
பேரழிவு சேதத்தை எதிர்கொள்ளத் தயாராகும் ஜமைக்கா
மெலிசா புயல் கிங்ஸ்டனுக்கு தென்மேற்கே சுமார் 150 மைல்கள் (240 கிலோமீட்டர்) தொலைவிலும், கியூபாவின் குவாண்டநாமோவிற்கு தென்மேற்கே சுமார் 330 மைல்கள் (530 கிலோமீட்டர்) தொலைவிலும் மையம் கொண்டிருந்தது.
இந்த புயல் மணிக்கு அதிகபட்சமாக 175 மைல்கள் (280 கிமீ) வேகத்தில் காற்று வீசியது மற்றும் மணிக்கு 2 மைல்கள் (4 கிமீ) வேகத்தில் வடக்கு-வடகிழக்கு நோக்கி நகர்ந்து கொண்டிருந்ததாக மியாமியில் உள்ள அமெரிக்க தேசிய சூறாவளி மையம் தெரிவித்துள்ளது.
வெள்ளத்தால் பாதிக்கப்படும் சமூகங்களில் இருந்து மக்களை வெளியேற்ற அரசாங்கம் உத்தரவிட்ட போதிலும், பெரும்பாலான குடும்பங்கள் அந்த இடத்திலேயே தஞ்சம் புகுந்துள்ளதாக கிங்ஸ்டனுக்கு அருகிலுள்ள மெர்சி கார்ப்ஸ் ஆலோசகர் கொலின் போகிள் கூறினார்.
புயலுக்குப் பின்னர் பயன்படுத்த 50க்கும் மேற்பட்ட ஜெனரேட்டர்கள் (மின் பிறப்பாக்கி) இருப்பதாக ஜமைக்காவின் நீர் மற்றும் சுற்றுச்சூழல் அமைச்சர் மேத்யூ சமுதா கூறினார்.
அதேநேரம், சுத்தமான குடிநீரை சேமித்து வைத்து, அதை சிக்கனமாகப் பயன்படுத்துமாறும் அவர் மக்களை எச்சரித்தார்.
கியூபாவை குறிவைக்கும் மெலிசா
செவ்வாய்க்கிழமை பிற்பகுதியில் கிழக்கு கியூபாவிலும் மெலிசா புயல் சக்திவாய்ந்த சூறாவளியாக கரையைக் கடக்கும் என்று எதிர்பார்க்கப்பட்டது.
கிரான்மா, சாண்டியாகோ டி கியூபா, குவாண்டனாமோ மற்றும் ஹோல்குயின் மாகாணங்களுக்கு சூறாவளி எச்சரிக்கை அமுலில் உள்ளது.
அதே நேரத்தில் லாஸ் டுனாஸுக்கு வெப்பமண்டல புயல் எச்சரிக்கை அமுலில் உள்ளது.
கியூபாவின் சில பகுதிகளுக்கு 20 அங்குலங்கள் (51 சென்டிமீட்டர்) வரை மழை பெய்யும் என்றும், கடற்கரையில் குறிப்பிடத்தக்க புயல் அலை வீசும் என்றும் கணிக்கப்பட்டுள்ளது.
தீவின் இரண்டாவது பெரிய நகரமான சாண்டியாகோ உட்பட, இப்பகுதியில் இருந்து 600,000க்கும் மேற்பட்ட மக்களை வெளியேற்றி வருவதாக கியூப அதிகாரிகள் திங்களன்று தெரிவித்தனர்.
மெலிசா ஹைட்டி மற்றும் டொமினிகன் குடியரசின் தெற்குப் பகுதிகளையும் நனைத்துள்ளது, ஹைட்டிக்கு வெப்பமண்டல புயல் எச்சரிக்கை இன்னும் அமுலில் உள்ளது.
கியூபாவைத் தொடர்ந்து சூறாவளி வடகிழக்கு நோக்கித் திரும்பி புதன்கிழமை மாலைக்குள் தென்கிழக்கு பஹாமாஸைத் தாக்கும் என்று கணிக்கப்பட்டது.
தென்கிழக்கு மற்றும் மத்திய பஹாமாஸுக்கு ஒரு சூறாவளி எச்சரிக்கை அமலில் இருந்தது, மேலும் டர்க்ஸ் மற்றும் கைகோஸ் தீவுகளுக்கு வெப்பமண்டல புயல் எச்சரிக்கை விடுக்கப்பட்டது.
