அரச கதிரியல் தொழில்நுட்பவியலாளர்கள் சங்கம் நேற்று (21) காலை 8 மணிக்கு தொடங்கிய வேலைநிறுத்தப் போராட்டத்தை இன்று (22) காலை 8 மணி முதல் 7 நாட்களுக்கு தற்காலிகமாக நிறுத்தி வைக்க முடிவு செய்துள்ளது.
இந்த விவகாரம் தொடர்பாக நேற்று இரவு சுகாதார பிரதி அமைச்சருடன் குறித்த சங்கத்தினர் கலந்துரையாடலை ஒன்றினை முன்னெடுத்துள்ளனர்.
இதன்போது மாளிகாவத்தை சிறுநீரக வைத்தியசாலையின் பிரதி பணிப்பாளராக தனது கடமைகளைச் செய்யும் நபர் செய்த சட்டவிரோத மற்றும் முறைகேடு குறித்து ஏற்கனவே அவசர விசாரணை தொடங்கப்பட்டுள்ளதாகவும், சங்கத்தினரின் வேண்டுகோளின்படி பாரபட்சமற்ற விசாரணைக்கு தேவையான சூழலை உருவாக்க ஒரு வாரத்திற்குள் முடிவு எடுக்கப்படும் என்றும் ஒப்புக் கொள்ளப்பட்டது.
அதன்படி, அரச கதிரியல் தொழில்நுட்பவியலாளர்கள் சங்கத்தின் நிர்வாகக் குழு, இந்த வேலைநிறுத்தப் போராட்டத்தை 7 நாட்களுக்கு தற்காலிகமாக நிறுத்தி வைப்பதற்கும், ஒப்பந்தங்கள் வாக்குறுதியளிக்கப்பட்ட காலத்திற்குள் நிறைவேற்றப்படாவிட்டால் தொடர்ச்சியான வேலைநிறுத்தத்தைத் தொடங்குவதற்கும் முடிவு செய்துள்ளது.
இந்த தீர்மானத்துக்கு அமைவாக இன்று காலை 8 மணி முதல் நாடளாவிய ரீதியாக வைத்தியசாலைகளில் உள்ள கதிர்வீச்சு தொழில்நுட்ப வல்லுநர்களிடமிருந்து நோயாளிகள் அனைத்து சேவைகளையும் வழக்கம்போல் பெற முடியும்.
மாளிகாவத்தை சிறுநீரக வைத்தியசாலையின் பிரதிப் பணிப்பாளர், அரச அதிகாரத்தைப் பயன்படுத்தி பாரிய முறைகேடுகளில் ஈடுபட்டுள்ளதாகக் அரச கதிரியல் தொழில்நுட்பவியலாளர்கள் சங்கம் குற்றம் சுமத்தியுள்ளது.
தகுதியான அதிகாரிகள் இருக்கும்போது, கதிரியக்கப் பிரிவின் பொறுப்பதிகாரிக்குத் தெரியாமல் வெளியாட்களைக் கொண்டு கதிரியல் பரிசோதனைகளை முன்னெடுத்தமை, அரச சொத்துக்களை ஆபத்துக்குள்ளாக்கியமை மற்றும் அம்பியூலன்ஸ் வண்டிகளைத் தனிப்பட்ட தேவைகளுக்குப் பயன்படுத்தியமை போன்ற பல்வேறு குற்றச்சாட்டுகள் அவருக்கு எதிராக சுமத்தப்பட்டுள்ளன.
