செவ்வாய்க்கிழமை (இலங்கை நேரப்படி இன்று காலை) அன்று நடைபெற்ற அரையிறுதிப் போட்டியில், பிரான்ஸை 2-0 என்ற கோல் கணக்கில் வீழ்த்தி ஸ்பெய்ன் அணி 2026 ஃபிஃபா உலகக் கிண்ணத்தில் ஆச்சரியத்தை ஏற்படுத்தியது.
இந்த ஆட்டத்தில் லா ரோஜா (ஸ்பெய்ன்) அணிக்காக மிக்கேல் ஓயர்சபல் மற்றும் பெட்ரோ போரோ ஆகியோர் கோல் அடித்தனர்.
‘கோல்டன் பூட்’ (Golden Boot) போட்டியில் தொடர்ந்து முன்னிலையில் இருக்கும் கைலியன் எம்பாப்பே மற்றும் அவரது பிரான்ஸ் அணியால் கோல் எதுவும் அடிக்க முடியாமல் போனது.
இந்த வெற்றியுடன் ஸ்பெய்ன் அணி இறுதிப் போட்டிக்கு முன்னேறியது.
அங்கு அவர்கள், புதன்கிழமை (15) நடைபெறும் மற்றொரு அரையிறுதிப் போட்டியில் மோதவுள்ள ஆர்ஜென்டின அல்லது இங்கிலாந்து அணியை எதிர்கொள்வார்கள்.
டெக்ஸாஸின் டல்லாஸ் மைதானத்தில் செவ்வாய்க்கிழமை நடைபெற்ற மோதல், கால்பந்து உலகின் இந்த இரண்டு ஜாம்பவான்களுக்கும் இடையிலான 39 ஆவது சந்திப்பாக அமைந்தது.
இவர்களுக்கு இடையிலான முதல் போட்டி 1922-ஆம் ஆண்டிலேயே நடைபெற்றது.
இத்தனை முறை நேருக்கு நேர் மோதியிருந்தாலும், ஃபிஃபா உலகக் கிண்ணத்தில் இவர்கள் மோதுவது இது வெறும் இரண்டாவது முறை மட்டுமே என்பது குறிப்பிடத்தக்கது.
இதற்கு முன் உலகக் கிண்ணத்தில் இவர்கள் மோதியது 2006-ஆம் ஆண்டில்; அப்போது ‘லெஸ் ப்ளூஸ்’ (பிரான்ஸ்) அணி, ‘லா ரோஜா’ (ஸ்பெய்ன்) அணியை 3-1 என்ற கணக்கில் எளிதாக வீழ்த்தி ‘சூப்பர் 16’ சுற்றில் வெற்றி பெற்றது.
இவ்விரு அணிகளுக்கும் இடையிலான வரலாற்றில், பிரான்ஸ் 18 வெற்றிகளையும் ஸ்பெய்ன் 14 வெற்றிகளையும் பெற்றுள்ளன.
மேலும் ஏழு ஆட்டங்கள் சமநிலையில் முடிந்துள்ளன.
கடந்த ஆண்டும் இதே அணிகள் ‘யுஇஎஃப்ஏ நேஷன்ஸ் லீக்’ (UEFA Nations League) தொடரின் அரையிறுதியில் மோதிய நிலையில், தொடர்ந்து இரண்டாவது ஆண்டாக அவர்கள் அரையிறுதிச் சுற்றில் சந்திக்கின்றனர்.
அந்த ஆட்டத்தில் ஸ்பெய்ன் 5-4 என்ற கணக்கில் வெற்றி பெற்றமையும் குறிப்பிடத்தக்கது.
