உலகக் கிண்ணத்தை கலக்கும் குட்டி ஹீரோ!

2026 ஃபிஃபா (FIFA) உலகக் கிண்ணத்தில் சிறப்பான ஆட்டத்தை வெளிப்படுத்திய வீரர்களில் ஒருவராக லாமின் யமால் (Lamine Yamal) திகழ்கிறார்.

ஆனால், அவரது குடும்பத்தில் செய்திகளில் இடம்பிடிக்கும் ஒரே நபர் இந்த ஸ்பானிய முன்கள வீரர் மட்டுமல்ல. 

ஸ்பெய்ன் அணி இறுதிப் போட்டி வரை முன்னேறிய பயணத்தின்போது, ​​லாமின்ன் யமாலின் மூன்று வயதுடைய ஒன்றுவிட்ட சகோதரர் கெய்ன் (Keyne), மிகவும் அன்பான மற்றும் நெகிழ்ச்சியான தருணங்கள் மூலம் எதிர்பாராத விதமாக அனைவரின் கவனத்தையும் ஈர்த்து ஒரு ‘ஹீரோ’வாகத் திகழ்கிறார்.

யார் இந்த கெய்ன்?

2026 ஃபிஃபா உலகக் கிண்ணத்தில் ஸ்பெய்ன் தேசிய அணிக்காகப் விளையாடும் லாமின்ன் யமாலுக்கு, பாரா (சகோதரி) மற்றும் கெய்ன் (சகோதரன்) ஆகிய இரு ஒன்றுவிட்ட, சகோதரர்கள் உள்ளனர்.

‘தி அத்லெடிக்’ (The Athletic) தகவலின்படி, மௌனிர் நஸ்ராவ் மற்றும் ஷீலா எபானா ஆகியோருக்கு ஜூலை 2007-ல் யமால் பிறந்தார்.

அப்போது தம்பதியர் இருவரும் இளம் வயதினராக இருந்தனர். 

யமாலுக்கு மூன்று வயதாக இருந்தபோது அவர்கள் பிரிந்துவிட்டனர். 

இருப்பினும், அவர்கள் இருவரும் தங்கள் வாழ்க்கையில் அடுத்த கட்டத்திற்கு நகர்ந்து புதிய இணையர்களுடன் குழந்தைகளைப் பெற்றிருந்தாலும், ஒரு நெருக்கமான குடும்ப உறவைத் தொடர்ந்து பேணி வருகின்றனர்.

ஸ்பெய்னின் அந்த ‘ரைட் விங்கர்’ (right winger) வீரரின் தாயார் மறுமணம் செய்துகொண்டு, செப்டம்பர் 2022-ல் கெய்ன் (Keyne) என்ற மகனைப் பெற்றெடுத்தார். 

அந்தச் சிறுவன் இன்னும் மழலைப்பருவத்திலேயே இருந்தாலும், தனது அண்ணனுக்கு எப்போதும் துணையாக இருப்பது, மைதானத்தில் அமர்ந்து அவருக்கு உற்சாகமூட்டுவது மற்றும் சமூக ஊடகப் பதிவுகளில் அவருடன் இணைந்து தோன்றுவது ஆகியவற்றின் மூலம் கால்பந்து உலகில் பிரபலமாகிவிட்டான்.

2023-இல் யமால் பார்சிலோனா அணிக்காக அறிமுகமானதிலிருந்து, அவரது தம்பி மைதானத்தில் தவறாமல் இடம்பெற்று வருகிறார்.

2024-இல் யமாலும் அவரது ஸ்பானிய அணி வீரர்களும் UEFA ஐரோப்பிய சாம்பியன்ஷிப் பட்டத்தை வென்றபோது, ​​தனது தாயுடன் போட்டியைப் பார்த்துக்கொண்டிருந்த கெய்ன், மைதானத்திற்குள் ஓடிச் சென்று தன் சகோதரனுடன் வெற்றியை கொண்டாடினார்.

2024 ஆகஸ்ட்டில் அத்லெடிக் கிளப் பில்பாவ் (Athletic Club Bilbao) அணிக்கு எதிரான பார்சிலோனா போட்டியின்போது, ​​கெய்ன் மைதானத்தில் தன் சகோதரனுடன் இணைந்து பயிற்சி செய்ததுடன், கால்பந்தை அவருடன் மாறி மாறி உதைத்து விளையாடினார். 

2025 மே மாதத்தில் நடைபெற்ற மற்றொரு போட்டியின்போது, ​​கெய்ன் தனக்கு ஏற்ற வயதுடைய ஒருவருடன் — அதாவது பார்சிலோனா அணியின் மற்றொரு வீரரான ரஃபேல் டயஸ் பெல்லோலி (ரஃபின்ஹா)-வின் சிறு வயது மகனுடன் — மைதானத்தில் விளையாடுவது படம்பிடிக்கப்பட்டது.

2024 ஒக்டோபரில், பாரிஸில் நடந்த பலோன் டி’ஓர் விழாவில் யமால் மதிப்புமிக்க கோபா கோப்பையைப் பெற்றார். 

அப்போது, ​​கெய்ன் உட்பட அவரது முழு குடும்பமும் அவருக்குத் துணையாக இருந்தது. 

ஒரு சிறு குழந்தையைப் போலவே, கெய்ன் கேமராக்களை நேராகப் பார்ப்பதை விட, சிவப்பு கம்பளத்தில் சாம்பியன்ஸ் லீக் பந்துடன் விளையாடுவதில் அதிக ஆர்வம் காட்டினான்.

தற்போது கெய்ன் பார்சிலோனா ரசிகர் கலாச்சாரத்தின் ஒரு அங்கமாகிவிட்டான். 

கெய்ன் “எனது மகனைப் போன்றவன்

தனது விளையாட்டு வாழ்க்கைக்கு ஆதரவளித்ததற்காகத் தனது குடும்பத்தினருக்கு நன்றி தெரிவிப்பதில் யமால் ஒருபோதும் தயங்கியதில்லை; அதிலும் குறிப்பாக, தனது தம்பி மீதான அன்பையும் அவர் வெளிப்படுத்தியுள்ளார்.

“எனது தம்பி இவ்வளவு மகிழ்ச்சியாக இருப்பதையும், அதேபோல எனது அம்மாவும் நண்பர்களும் தாங்கள் எப்போதும் கனவு கண்ட வாழ்க்கையை வாழ்வதையும் பார்க்கும்போது நான் நெகிழ்ச்சியடைகிறேன்,” என்று 2026 ஜூலையில் நடைபெற்ற செய்தியாளர் சந்திப்பு ஒன்றில் யமால் கூறினார்.

“எனது தம்பிதான் எனக்கு எல்லாம். அவன் மீது எனக்கு மிகுந்த அன்பு உண்டு; அவன் என் மகனைப் போலவே எனக்குத் தோன்றுகிறான்” என்றும் அவர் கூறினார்.

சமூக ஊடகங்களையும் கலக்கும் கெய்ன்

கெய்ன் ஏற்கனவே சமூக ஊடக உலகில் தனக்கென ஒரு இடத்தைப் பிடித்துள்ளார்.

டிக்டொக்கில் (TikTok) சுமார் 50 மில்லியன் பின்தொடர்பவர்களைக் கொண்ட யமால் (Yamal), கெய்ன் தொடர்பான பல காணொளிகளைப் பகிர்ந்துள்ளார்.

இதில் அந்தச் சிறுவன் பொம்மை மெர்சிடிஸ்-பென்ஸ் காரை ஓட்டுவது, கைகுலுக்குவது மற்றும் ஒன்றாக நடனமாடுவது போன்ற இனிமையான தருணங்களும் அடங்கும்.

இன்ஸ்டாகிராமில் 8 இலட்சத்திற்கும் அதிகமான பின்தொடர்பவர்களைக் கொண்ட கெய்னின் தாயாரும், தனது இளைய மகனுடன் எடுக்கப்பட்ட இயல்பான மற்றும் விளம்பர ரீதியான காணொளிகளைப் பகிர்ந்து வருகிறார்.

 ‘டெலீட்டோ’ (Deleito) என்ற உணவகச் சங்கிலி நிறுவனத்தை விளம்பரப்படுத்தும் காணொளி ஒன்றிலும் கெய்ன் தோன்றியுள்ளார்.

சமூக ஊடகங்களில் தனக்குள்ள பிரபலத்தைத் தாண்டி, 2026 ஃபிஃபா உலகக் கிண்ணத் தொடர்பான நிகழ்வுகள் மூலமாகவும் கெய்ன் புதிய பார்வையாளர்களைச் சென்றடைந்துள்ளார். 

ஜூலை 2 அன்று அவுஸ்திரியாவுக்கு எதிரான ஆட்டத்தில் ஸ்பெய்ன் அணி தனது மூன்றாவது கோலை அடித்தபோது, ​​கெய்ன் உற்சாகத்துடன் “கம் ஆன்!” (Come on!) என்று கத்தியது இணையத்தில் வைரலானது.