ஈரானுடனான மோதல் தொடங்கி எட்டு மாதங்கள் ஆகிவிட்ட நிலையில், அணு ஆயுதங்களை உருவாக்கும் திட்டங்களை ஈரான் “கிட்டத்தட்ட கைவிட்டுவிட்டதாக” அமெரிக்க ஜனாதிபதி டொனால்ட் ட்ரம்ப் தெரிவித்துள்ளார்.
இத்திட்டத்தைக் கைவிடச் செய்வதே ஈரானுக்கு எதிரான விவகாரத்தில் அவரது நிர்வாகம் அடிக்கடி வலியுறுத்தி வந்த முக்கிய நோக்கங்களில் ஒன்றாகும்.
பெப்ரவரி 28 அன்று இஸ்ரேலும் அமெரிக்காவும் ஈரான் மீது தாக்குதல்களை நடத்தியதைத் தொடர்ந்து நீண்ட காலமாக உயர்ந்திருந்த மசகு எண்ணெய் விலைகள், தற்போது குறைந்து வருவதாக சனிக்கிழமையன்று (03) ட்ரம்ப் கூறினார்.
அமெரிக்காவின் ஓஹியோ மாகாணத்தில் நடைபெறவுள்ள பொதுக்கூட்டத்தில் பங்கேற்க வெள்ளை மாளிகையிலிருந்து புறப்பட்டபோது இது தொடர்பில்செய்தியாளர்களிடம் பேசிய ட்ரம்ப், எண்ணெய் விலை குறைந்து வருகிறது, தற்போது எண்ணெய் விலை குறைவாக உள்ளது, பைடன் நிர்வாகத்தின் காலத்தில் இருந்ததை விடவும் இது குறைவாகவே இருக்கிறது.
அதேவேளையில், ஈரான் அணு ஆயுதத்தைப் பெறக்கூடாது என்ற விடயத்தில் அவர்கள் எந்த நடவடிக்கையும் எடுக்கவில்லை.
அதேவேளையில், உங்களுக்குத் தெரிந்தபடி, ஈரான் அணு ஆயுதத் தயாரிப்புக்கான எந்தவொரு திட்டத்தையும் ஏறக்குறைய கைவிட்டுவிட்டது – என்று கூறினார்.
அணு ஆயுதங்களை உருவாக்க ஈரான் முயல்வதாக அமெரிக்கா மற்றும் இஸ்ரேல் முன்வைக்கும் குற்றச்சாட்டுகளை ஈரான் நீண்ட காலமாக மறுத்து வருகிறது.
ஐக்கிய நாடுகள் பொதுச் சபைக் கூட்டத்தில் பங்கேற்பதற்காக கடந்த மாதம் நியூயோர்க் சென்றிருந்த ஜனாதிபதி மசூத் பெசெஷ்கியனும் இந்தக் கருத்தை மீண்டும் வலியுறுத்தினார்.
மத ரீதியான தடை காரணமாகவே தாங்கள் அணு ஆயுதங்களைத் தேடவில்லை என்று கூறிய பெசெஷ்கியன், சர்வதேச கண்காணிப்பின் கீழ் தங்கள் செறிவூட்டப்பட்ட யுரேனியம் இருப்பைக் குறைத்துக்கொள்ள முன்வந்தார்.
இருப்பினும், அமெரிக்கா பொருளாதாரத் தடைகளை நீக்காத வரையில், அமைதியான நோக்கிலான தங்கள் குடிமைசார் அணுசக்தித் திட்டத்தில் எந்தவித சமரசமும் செய்துகொள்ளவோ அல்லது கட்டமைப்பு ரீதியான சலுகைகளை வழங்கவோ மாட்டோம் என்று ஈரான் தொடர்ந்து வலியுறுத்தி வருகிறது.
அமெரிக்க நாடாளுமன்றத்தில் (காங்கிரஸில்) தங்களது பெரும்பான்மையைத் தக்கவைக்க முயன்று வரும் நிலையில், செனட் சபை இடத்தைக் கைப்பற்றக் கடும் போட்டியை எதிர்கொண்டுள்ள ஓஹியோ மாநிலத்திற்கு ட்ரம்ப் சனிக்கிழமையன்று சென்றார்.
பெட்ரோல் மற்றும் பிற அத்தியாவசியப் பொருட்களின் விலை உயர்வு நீடிப்பதாலும், ஈரான் மீதான போருக்கான ஆதரவு குறைந்து வருவதாலும், அமெரிக்கா முழுவதும் பதவியில் உள்ள பல குடியரசுக் கட்சி செனட்டர்கள் கடுமையான அரசியல் சவால்களை எதிர்கொண்டு வருகின்றனர்.
ஈரான் மீது மீண்டும் இராணுவத் தாக்குதல்கள் நடத்தப்படலாம் என்ற சாத்தியக்கூறுகளுக்குத் தயாராகி வரும் நிலையில், சவுதி அரேபியா மற்றும் கட்டாரில் உள்ள எரிசக்தி வசதிகளைப் பாதுகாப்பதற்காக, அமெரிக்க இராணுவம் அண்மைய நாட்களில் கூடுதலாக இரண்டு பேட்ரியாட் ஏவுகணைத் தொகுப்புகளை நிலைநிறுத்தியுள்ளதாகத் தகவல்கள் தெரிவிக்கின்றன.
ஒரு முக்கிய எண்ணெய் நிலையத்தைப் பாதுகாப்பதற்காக கடந்த மாதம் சவுதி அரேபியாவிற்கு ஒரு பீரங்கிப் படை அனுப்பப்பட்டது.
அதே நேரத்தில் ஒரு இயற்கை எரிவாயு நிலையத்தைப் பாதுகாப்பதற்காக கத்தாரில் மற்றொன்று நிலைநிறுத்தப்பட்டது என்று அந்த அறிக்கை தெரிவித்தது.
ஈரான் மீது அமெரிக்கா மீண்டும் பெரிய அளவிலான போர்த் தாக்குதல்களைத் தொடங்கினால், வொஷிங்டன் இரு நாடுகளின் முக்கிய எரிசக்தி உள்கட்டமைப்பைப் பாதுகாக்கும் என்று இரு நாடுகளுக்கும் உறுதியளிக்கும் நோக்கிலேயே இந்தப் படைகள் நிலைநிறுத்தப்பட்டமையும் குறிப்பிடத்தக்கது.
