நியூஸிலாந்து கிரிக்கெட் அணிக்கெதிரான டெஸ்ட் தொடரில் விளையாடும், பாகிஸ்தான் அணி விபரம் அறிவிக்கப்பட்டுள்ளது.
முன்னணி துடுப்பாட்ட வீரரான அசார் அலி ஓய்வு பெற்றதைத் தொடர்ந்து, அணியில் அறிமுக துடுப்பாட்ட வீரரான கம்ரான் குலாம் சேர்த்துக் கொள்ளப்பட்டுள்ளார்.
மேலும், ஹசன் அலி மீண்டும் டெஸ்ட் அணிக்கு திரும்பியுள்ளார், அதே சமயம் இங்கிலாந்துக்கு எதிரான டெஸ்ட் அணியில் இடம்பெற்றிருந்த முகமது அலி மற்றும் ஃபஹீம் அஷ்ரப் ஆகியோர் நீக்கப்பட்டுள்ளனர்.
இங்கிலாந்து அணிக்கெதிரான ராவல்பிண்டியில் நடைபெற்ற டெஸ்டில் களத்தடுப்பு செய்யும் போது, ஏற்பட்ட காயத்தில் இருந்து குணமடைந்து வருவதால் ஹாரிஸ் ரவுஃப் அணியில் சேர்க்கப்படவில்லை.
இருப்பினும், தோள்பட்டை காரணமாக முல்தான் மற்றும் கராச்சி டெஸ்டில் விளையாடாத வேகப்பந்து வீச்சாளர் நசீம் ஷா அணியில் இணைத்துக்கொள்ளப்பட்டுள்ளார்.
பாபர் அசாம் தலைமையிலான இந்த அணியில், அப்துல்லா ஷபீக், அப்ரார் அகமது, ஹசன் அலி, இமாம் உல் ஹக், கம்ரான் குலாம், முகமது நவாஸ், முகமது ரிஸ்வான், முகமது வாசிம் ஜூனியர், நசீம் ஷா, நோமன் அலி, சர்பராஸ் அகமது, சல்மான் அலி ஆகா, சவுத் ஷகீல், ஷான் மசூத் மற்றும் ஸாஹித் மெஹமித் ஆகியோர் இடம்பெற்றுள்ளனர்.
பாகிஸ்தான் அணி நியூசிலாந்திற்கு எதிராக இரண்டு டெஸ்ட் போட்டிகளில் விளையாட உள்ளது, முதல் போட்டி டிசம்பர் 26ஆம் திகதி கராச்சியிலும், இரண்டாவது போட்டி ஜனவரி 3ஆம் திகதி முல்தானிலும் தொடங்குகிறது.
