சாய்ந்தமருது சமுர்த்தி வங்கி டிஜிட்டல் யுகத்திற்கு – ஒன்லைன் வங்கிச் சேவை உத்தியோகபூர்வமாக அறிமுகம்!

சாய்ந்தமருது சமுர்த்தி வங்கி தனது சேவைகளை நவீனமயமாக்கும் முக்கிய முன்னேற்றமாக, டிஜிட்டல் வங்கிச் சேவையை (Online Banking) உத்தியோகபூர்வமாக அறிமுகப்படுத்தியுள்ளது.

இந்த அறிமுக நிகழ்வு நேற்று (04) வங்கிக் கிளையில் வங்கி முகாமையாளர் றியாத் ஏ. மஜீத் தலைமையில் சிறப்பாக நடைபெற்றது.

சாய்ந்தமருது பிரதேச செயலாளர் எம். எம். ஆசீக் பிரதம அதிதியாக கலந்து கொண்டு புதிய ஒன்லைன் வங்கிச் சேவையை திறந்து வைத்தார்.

நிகழ்வில் சிறப்பு அதிதிகளாக சாய்ந்தமருது சிரேஷ்ட பிரஜைகள் கவுன்சில் தலைவர் மற்றும் ஓய்வுபெற்ற கல்முனை ஸாஹிறாக் கல்லூரி அதிபர் ஏ. பீர் முஹம்மட், சாய்ந்தமருது அரச ஓய்வூதிய சங்கத் தலைவர் மற்றும் ஓய்வுபெற்ற அதிபர் எம்.ஐ.எம். இஸ்மாயில், தலைமைப்பீட சமுர்த்தி முகாமையாளர் ஏ.சி.ஏ. நஜீம், சமுர்த்தி வங்கிச் சங்க முகாமையாளர் எஸ். றிபாயா உள்ளிட்ட பலர் கலந்து கொண்டனர்.

மேலும் உதவி முகாமையாளர்கள், சமூக அபிவிருத்தி அதிகாரிகள் மற்றும் வங்கி பணியாளர்களும் நிகழ்வில் பங்கேற்றனர்.

சாய்ந்தமருது சமுர்த்தி வங்கி தனது 25ஆம் ஆண்டு நிறைவு வெள்ளி விழாவை கொண்டாடும் இத்தருணத்தில் இந்நவீன சேவையை அறிமுகப்படுத்தியுள்ளது குறிப்பிடத்தக்கது.

மக்களுக்கு விரைவான, பாதுகாப்பான மற்றும் எளிதான வங்கிச் சேவைகளை வழங்கும் நோக்கத்துடன் இந்த திட்டம் முன்னெடுக்கப்பட்டுள்ளது.

நிகழ்வில் உரையாற்றிய வங்கி முகாமையாளர் றியாத் ஏ. மஜீத், “சமுர்த்தி வங்கி சேவைகளை முழுமையான டிஜிட்டல் தளத்திற்கு கொண்டு வருவது எமது நீண்டநாள் இலட்சியம். இன்று அது நனவாகியுள்ளது.

இதன் மூலம் வாடிக்கையாளர்கள் எளிதாகவும் பாதுகாப்பாகவும் வங்கிச் சேவைகளைப் பெற முடியும்” எனத் தெரிவித்தார்.

மேலும், இந்த புதிய ஒன்லைன் சேவை வங்கியின் சேவை தரத்தையும் வேகத்தையும் உயர்த்துவதோடு, மக்களின் நேரத்தையும் செலவையும் மிச்சப்படுத்தும் எனவும் அவர் குறிப்பிட்டார்.

கிராமப்புற மக்களுக்கும் நவீன தொழில்நுட்ப அடிப்படையிலான வங்கிச் சேவைகளை கொண்டு சேர்க்கும் முக்கிய முயற்சியாக இதை கருதுகின்றோம் என்றும் தெரிவித்தார்.

இந்த டிஜிட்டல் மாற்றத்தை வெற்றிகரமாக முன்னெடுக்க ஒத்துழைப்பு வழங்கிய உயர் அதிகாரிகள் மற்றும் பணியாளர்களுக்கு அவர் தனது நன்றியைத் தெரிவித்துக் கொண்டார்.

சாய்ந்தமருது சமுர்த்தி வங்கியின் இந்நவீன முயற்சி, கிராமப்புற வங்கிச் சேவைகளை டிஜிட்டல் தளத்திற்கு கொண்டு செல்லும் புதிய கட்டத்தை தொடங்கியுள்ளதாக சமூகத்தில் பாராட்டப்படுகிறது.