இலங்கையில் 2026 ஆம் ஆண்டில் இதுவரை பதிவான டெங்கு நோயாளிகளின் எண்ணிக்கை 95,035 ஆக உயர்வடைந்துள்ளதாகத் தேசிய டெங்கு கட்டுப்பாட்டுப் பிரிவு வெளியிட்டுள்ள அறிக்கையில் தெரிவிக்கப்பட்டுள்ளது.
நடப்பு ஆகஸ்ட் மாதத்தில் மட்டும் 9,699 டெங்கு நோயாளிகள் அடையாளம் காணப்பட்டுள்ளதுடன், இந்த ஆண்டில் இதுவரை 72 டெங்கு மரணங்கள் அதிகாரப்பூர்வமாகப் பதிவாகியுள்ளன.
மாகாண அடிப்படையில் அதிகபட்சமாக மேற்கு மாகாணத்தில் 50,287 நோயாளிகள் கண்டறியப்பட்டுள்ளனர். இதர மாகாணங்களான தெற்கு மாகாணத்தில் 13,843 பேரும், மத்திய மாகாணத்தில் 8,647 பேரும், சபரகமுவ மாகாணத்தில் 7,808 பேரும் பாதிப்புக்குள்ளாகியுள்ளனர்.
மாவட்ட மட்டத்தில் அதிகபட்சமாக கம்பஹா மாவட்டத்தில் 20,248 நோயாளிகள் பதிவாகியுள்ளனர். அத்துடன் கொழும்பு மாவட்டத்தில் 18,842 பேரும், கண்டி மாவட்டத்தில் 6,931 பேரும், மாத்தறை மாவட்டத்தில் 6,125 பேரும், களுத்துறை மாவட்டத்தில் 6,122 பேரும் அடையாளம் காணப்பட்டுள்ளனர். நாட்டில் டெங்கு பரவல் தீவிரமடைந்துள்ளதைத் தொடர்ந்து, தீவு முழுவதிலும் உள்ள 76 சுகாதார மருத்துவ அதிகாரி (MOH) பிரிவுகள் அதிக அபாயகர மண்டலங்களாக அறிவிக்கப்பட்டுள்ளமை குறிப்பிடத்தக்கது.
