ராவல்பிண்டி மைதானத்தில் நேற்றிரவு (13) நடைபெற்ற மூன்றாவது டி:20 போட்டியில் அணித் தலைவர் குசல் மெண்டிஸ் 4 சிக்ஸர்கள் மற்றும் 9 பவுண்டரிகள் உட்பட 48 பந்துகளில் 87 ஓட்டங்கள் விளாச இலங்கை அணி 169 ஓட்டங்கள் என்ற வெற்றி இலக்கை 17.1 ஓவர்களில் எட்டி ஆறுதல் வெற்றியைப் பதிவு செய்தது.
மூன்று போட்டிகள் கொண்ட டி:20 தொடரின் முதல் இரண்டு ஆட்டங்களில் முறையே நான்கு விக்கெட் மற்றும் 82 ஓட்டங்கள் வித்தியாசத்தில் வெற்றி பெற்ற பாகிஸ்தான் 2-1 என்ற கணக்கில் தொடரைக் கைப்பற்றியது.
நேற்றைய ஆட்டத்தில் முதலில் துடுப்பாட்டம் செய்ய அழைக்கப்பட்ட பாகிஸ்தான் அணிக்கு மூன்றாவது போட்டியின் சூழல் கடினமாக அமைந்தது.
அணியின் ஓட்ட எண்ணிக்கை 34-ஆக இருந்தபோது, அடுத்தடுத்த பந்துகளில் தொடக்க ஆட்டக்காரர் ஃபகர் ஜமான் (12) மற்றும் மாஸ் சதாக்கத் (0) ஆகியோர் ஆட்டமிழந்தனர்.
ஹசன் நவாஸ் (16) மற்றும் அப்துல் சமத் (15) ஆகியோர் சாஹிப்சாதா ஃபர்ஹானுடன் இணைந்து அணியின் ஓட்ட எண்ணிக்கையை உயர்த்த உதவினாலும், கடைசி ஐந்து ஓவர்களில் 59 ஓட்டங்களை குவித்து பாகிஸ்தான் அணியின் ஓட்ட வேகம் அதிகரித்தது.
இறுதிக்கட்டத்தில் அராஃபத் மின்ஹாஸ் அதிரடியாக ஆடி, ஃபர்ஹானுடன் இணைந்து ஏழாவது விக்கெட்டுக்கு 66 ஓட்டங்கள் சேர்த்ததன் மூலம் அணியின் மொத்த ஓட்ட எண்ணிக்கையை ஓரளவுக்குக் கௌரவமான நிலைக்கு உயர்த்த உதவினார்.
மின்ஹாஸ் 20 பந்துகளில் ஆட்டமிழக்காமல் 34 ஓட்டங்கள் எடுத்தபோது இரண்டு பவுண்டரிகளையும் இரண்டு சிக்ஸர்களையும் அடித்தார்.
இதனிடையே, நல்ல ஃபோர்மில் இருந்த தலைவர் சாஹிப்சாதா ஃபர்ஹான் 168-8 என்ற ஓட்ட எண்ணிக்கையை எட்டச் செய்தார்.
அவர் 47 பந்துகளில் 76 ஓட்டங்கள் (மூன்று சிக்ஸர்கள் மற்றும் ஏழு பவுண்டரிகள் உட்பட) எடுத்தார்.
இலங்கை அணியின் சிறந்த பந்து வீச்சாளராக தசூன் ஷானக்க (21 ஓட்டங்களுக்கு 3 விக்கெட்) திகழ்ந்தார்.
அவரைத் தவிர நுவான் துஷார மற்றும் ஈஷான் மலிங்கா ஆகியோரும் தலா இரண்டு விக்கெட்டுகளை வீழ்த்தினர்.
சேஸிங்கில், தொடக்க ஆட்டக்காரர் சினெத் ஜெயவர்தன ஐந்து பவுண்டரிகள் மற்றும் இரண்டு சிக்ஸர்கள் அடங்கலாக 26 பந்துகளில் 38 ஓட்டங்கள் என்ற அதிரடி ஆட்டத்தை வெளிப்படுத்தியதன் மூலம் இலங்கை அணி சிறப்பான தொடக்கத்தைப் பெற்றது.
74 ஓட்டங்களுக்கு 2 விக்கெட்டுகள் என்ற நிலையிலிருந்து, மெண்டிஸ் மற்றும் கமிந்து மெண்டிஸ் ஆகியோர் பாகிஸ்தானை மேலும் விக்கெட்டுகள் வீழ்த்த அனுமதிக்காமல் மூன்றாவது விக்கெட்டுக்கு ஆட்டமிழக்காத 98 ஓட்டங்கள் கூட்டணியை அமைத்தனர்.
கமிந்து மெண்டிஸ், 27 பந்துகளில் ஆட்டமிழக்காமல் எடுத்த 40 ஓட்டங்களில் நான்கு பவுண்டரிகளை அடித்தார்.
இறுதியில் இலங்கை அணி 17.1 ஓவரில் 2 விக்கெட் இழப்புக்கு 172 ஓட்டங்களை எடுத்து வெற்றி இலக்கினை கடந்தது.
போட்டியின் ஆட்டநாயகனாக குசல் மெண்டிஸ் தெரிவானதுடன், தொடரின் நாயகனாக சாஹிப்சாதா ஃபர்ஹான் தெரிவானார்.
