சர்வதேச வறுமை ஒழிப்பு தினம் இன்று (17) உலகளாவிய ரீதியில் அனுஷ்டிக்கப்படுகிறது. வறுமையை ஒழிப்பதன் அவசியத்தை வலியுறுத்துவதுடன், வறுமையால் பாதிக்கப்பட்ட மக்களின் வாழ்க்கைத் தரத்தை மேம்படுத்துவதையும் நோக்கமாகக் கொண்டு இத்தினம் அனுஷ்டிக்கப்படுகிறது.
இவ்வாண்டுக்கான கருப்பொருளாக “அனைவருக்கும் பாதுகாப்பான வீடுகள்” என்பது தெரிவு செய்யப்பட்டுள்ளது. பாதுகாப்பான மற்றும் வசிப்பதற்கேற்ற வீடுகள் கிடைப்பது மனிதர்களின் அடிப்படைத் தேவைகளில் ஒன்றாகும். எனினும், உலகின் பல பகுதிகளில் வாழும் மக்கள் இன்றும் வறுமை, வீடற்ற நிலை மற்றும் அடிப்படை வசதிகளின் பற்றாக்குறை போன்ற சவால்களை எதிர்கொண்டு வருகின்றனர்.
ஐக்கிய நாடுகள் சபையின் அறிக்கைகளின்படி, உலகளவில் சுமார் 700 மில்லியன் மக்கள் வறுமையில் வாழ்கின்றனர். இவர்களில் கணிசமான எண்ணிக்கையிலானோர் துணை சஹாரா ஆபிரிக்கப் பிராந்தியத்தில் வசிக்கின்றனர். மேலும், வறுமையால் பாதிக்கப்பட்ட பலர் ஆயுத மோதல்கள் மற்றும் அரசியல் ஸ்திரமற்ற சூழ்நிலைகளுக்கு மத்தியில் வாழ்ந்து வருவதாகவும் தெரிவிக்கப்படுகிறது.
வறுமை என்பது உணவு, உடை மற்றும் இருப்பிடம் போன்ற அடிப்படைத் தேவைகளைப் பெற்றுக்கொள்வதில் ஏற்படும் சிரமம் மட்டுமல்ல. கல்வி, சுகாதாரம், வேலைவாய்ப்பு மற்றும் சமூகப் பாதுகாப்பு போன்ற அத்தியாவசிய வாய்ப்புகளையும் அது பாதிக்கிறது. இதனால், வறுமையை ஒழிப்பதற்கு நீண்டகாலத் திட்டங்களும் சமூக மற்றும் பொருளாதார முன்னேற்ற நடவடிக்கைகளும் அவசியமாகின்றன.
இதேவேளை, 2022ஆம் ஆண்டு ஏற்பட்ட கடுமையான பொருளாதார நெருக்கடியைத் தொடர்ந்து இலங்கையிலும் வறுமை அதிகரித்துள்ளது. உலக வங்கியின் மதிப்பீடுகளின்படி, இலங்கையின் மொத்த சனத்தொகையில் சுமார் 24 சதவீதமானோர் தொடர்ந்தும் வறுமையால் பாதிக்கப்பட்டுள்ளனர்.
வாழ்க்கைச் செலவு அதிகரிப்பு, வருமானப் பற்றாக்குறை மற்றும் அத்தியாவசியப் பொருட்களைப் பெற்றுக்கொள்வதில் ஏற்படும் சிரமங்கள் போன்றவை பல குடும்பங்களின் வாழ்க்கையைப் பாதித்து வருகின்றன. இந்நிலையில், வறுமையைக் குறைப்பதற்கான நடவடிக்கைகளுடன், பாதுகாப்பான வீடுகள், நிலையான வருமானம் மற்றும் அடிப்படைச் சேவைகள் அனைவருக்கும் கிடைப்பதை உறுதிப்படுத்த வேண்டிய அவசியமும் வலியுறுத்தப்படுகிறது.
சர்வதேச வறுமை ஒழிப்பு தினம், வறுமையால் பாதிக்கப்பட்ட மக்களின் பிரச்சினைகள் குறித்து விழிப்புணர்வை ஏற்படுத்துவதற்கும், அனைவருக்கும் கண்ணியமான வாழ்க்கையை உறுதிப்படுத்துவதற்கான கூட்டு முயற்சிகளின் முக்கியத்துவத்தை நினைவூட்டுவதற்குமான ஒரு நாளாக அமைகிறது.
