பங்களாதேஷ் அணிக்கெதிரான மூன்றாவது ரி-20 போட்டியில், நியூஸிலாந்துக் கிரிக்கெட் அணி 52 ஓட்டங்களால் வெற்றிபெற்றுள்ளது.
இந்த வெற்றியின் மூலம் ஐந்து போட்டிகள் கொண்ட ரி-20 தொடரில், 1-2 என்ற கணக்கில் நியூஸிலாந்து அணி உள்ளது.
டாக்கா மைதானத்தில் நேற்று (ஞாயிற்றுக்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற நியூஸிலாந்து அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய நியூஸிலாந்து அணி, நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகள் இழப்புக்கு 128 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, ஹென்ரி நிக்கோல்ஸ் ஆட்டமிழக்காது 36 ஓட்டங்களையும் டொம் பிளென்டல் ஆட்டமிழக்காது 30 ஓட்டங்களையும் பெற்றுக்கொண்டனர்.
பங்களாதேஷ் அணியின் பந்துவீச்சில், செய்பூதின் 2 விக்கெட்டுகளையும் மெயிடி ஹசன், முஷ்டபிசுர் மற்றும் மொஹமதுல்லா ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 129 என்ற வெற்றி இலக்கை நோக்கி பதிலுக்கு களமிறங்கிய பங்களாதேஷ் அணி, 19.4 ஓவர்கள் நிறைவில் அனைத்து விக்கெட்டுகளையும் இழந்து 76 ஓட்டங்களுக்கு சுருண்டது. இதனால் நியூஸிலாந்து அணி 52 ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, முஷ்பிகுர் ரஹீம் ஆட்டமிழக்காது 20 ஓட்டங்களையும் லிடொன் தாஸ் 15 ஓட்டங்களையும் பெற்றுக்கொண்டனர்.
நியூஸிலாந்து அணியின் பந்துவீச்சில், அஜாஸ் பட்டேல் 4 விக்கெட்டுகளையும் கோல் மெக்கொன்சி 3 விக்கெட்டுகளையும் ரச்சின் ரவிந்திரா, ஸ்கொட் குக்லெஜ்ன் மற்றும் கொலின் டி கிராண்ட்ஹோம் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 4 விக்கெட்டுகளை வீழ்த்திய அஜாஸ் பட்டேல் தெரிவுசெய்யப்பட்டார்.
