ரி-20 உலகக்கிண்ணத் தொடரின் 24ஆவது லீக் போட்டியில், பாகிஸ்தான் கிரிக்கெட் அணி 5 விக்கெட்டுகளால் வெற்றிபெற்றுள்ளது.
டுபாயில் நேற்று (வெள்ளிக்கிழமை) குழு 2இல் நடைபெற்ற இப்போட்டியில், பாகிஸ்தான் கிரிக்கெட் அணியும் ஆப்கானிஸ்தான் அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற ஆப்கானிஸ்தான் அணி முதலில் துடுப்பெடுத்தாட தீர்மானித்தது.
இதன்படி முதலில் துடுப்பெடுத்தாடிய ஆப்கானிஸ்தான் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 147 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, நபி மற்றும் குல்பதீன் ஆகியோர் ஆட்டமிழக்காது தலா 35 ஓட்டங்களையும் நஜிபுல்லா 22 ஓட்டங்களையும் பெற்றுக்கொண்டனர்.
பாகிஸ்தான் கிரிக்கெட் அணியின் பந்துவீச்சில், இமாட் வசிம் 2 விக்கெட்டுகளையும் ஷயின் ஷா அப்ரிடி, ஹரிஸ் ரவூப், ஹசன் அலி மற்றும் சதாப் கான் ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 148 என்ற வெற்றி இலக்கை நோக்கி பதிலுக்கு களமிறங்கிய பாகிஸ்தான் கிரிக்கெட் அணி, 19 ஓவர்கள் நிறைவில் 5 விக்கெட்டுகள் இழப்புக்கு வெற்றி இலக்கை கடந்தது. இதனால் பாகிஸ்தான் அணி 5 விக்கெட்டுகளால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, பாபர் அசாம் 51 ஓட்டங்களையும் பகர் சமான் 30 ஓட்டங்களையும் பெற்றுக்கொண்டனர்.
ஆப்கானிஸ்தான் அணியின் பந்துவீச்சில், ரஷித்கான் 2 விக்கெட்டுகளையும் முஜிப்புர் ரஹ்மான், மொஹமட் நபி மற்றும் நவீன் உல் ஹக் ஆகியோர் தலா 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 7 பந்துகளில் 4 சிக்ஸர்கள் அடங்களாக ஆட்டமிழக்காது 25 ஓட்டங்களை பெற்று அணியின் வெற்றிக்கு வித்திட்ட ஆசீப் அலி தெரிவுசெய்யப்பட்டார்.
