ரி-20 உலகக்கிண்ணத் தொடரின் 32ஆவது லீக் போட்டியில், நியூஸிலாந்து அணி 16 ஓட்டங்களால் வெற்றிபெற்றுள்ளது.
டுபாயில் நேற்று (புதன்கிழமை) குழு 2இல் நடைபெற்ற இப்போட்டியில், நியூஸிலாந்து அணியும் ஸ்கொட்லாந்து அணியும் பலப்பரீட்சை நடத்தின.
இப்போட்டியில் நாணய சுழற்சியில் வெற்றிபெற்ற ஸ்கொட்லாந்து அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய நியூஸிலாந்து அணி நிர்ணயிக்கப்பட்ட 20 ஓவர்கள் நிறைவில், 5 விக்கெட்டுகள் இழப்புக்கு 172 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, மார்டின் கப்டில் 93 ஓட்டங்களையும் க்ளென் பிலிப்ஸ் 33 ஓட்டங்களையும் பெற்றுக்கொண்டனர்.
ஸ்கொட்லாந்து அணியின் பந்துவீச்சில், வீல் மற்றும் சப்யான் செரீப் ஆகியோர் தலா 2 விக்கெட்டுகளையும் மார்க் வாட் 1 விக்கெட்டினையும் வீழ்த்தினர்.
இதனைத்தொடர்ந்து 173 என்ற வெற்றி இலக்கை நோக்கி பதிலுக்கு களமிறங்கிய ஸ்கொட்லாந்து அணியால், 20 ஓவர்கள் நிறைவில் 5 விக்கெட்டுகள் இழப்புக்கு 156 ஓட்டங்களை மட்டுமே பெற முடிந்தது. இதனால் நியூஸிலாந்து அணி 16 ஓட்டங்களால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, மைக்கேல் லீஸ்க் ஆட்டமிழக்காது 42 ஓட்டங்களையும் மத்தியு க்ரோஸ் 27 ஓட்டங்களையும் பெற்றுக்கொண்டனர்.
நியூஸிலாந்து அணியின் பந்துவீச்சில், ட்ரெண்ட் போல்ட் மற்றும் இஷ் சோதி ஆகியோர் தலா 2 விக்கெட்டுகளையும் டிம் சவுத்தி 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக 56 பந்துகளில் 7 சிக்ஸர்கள் 6 பவுண்ரிகள் அடங்களாக 93 ஓட்டங்களை பெற்றுக்கொண்ட மார்டின் கப்டில் தெரிவுசெய்யப்பட்டார்.
