பட்லரின் தலைமையில் முதல் தொடரை வென்றது இங்கிலாந்து!

அவுஸ்ரேலியக் கிரிக்கெட் அணிக்கெதிரான இரண்டாவது ரி-20 போட்டியில், இங்கிலாந்துக் கிரிக்கெட் அணி 8 ஓட்டங்கள் வித்தியாசத்தில் வெற்றிபெற்றது.

இந்த வெற்றியின் மூலம் மூன்று போட்டிகள் கொண்ட ரி-20 தொடரில், 2-0 என்ற கணக்கில் முன்னிலைப் பெற்றுள்ள இங்கிலாந்து அணி, தொடரையும் வென்றுள்ளது.

கன்பெர்ரா மைதானத்தில் நேற்று (புதன்கிழமை) நடைபெற்ற இப்போட்டியில், நாணய சுழற்சியில் வெற்றிபெற்ற அவுஸ்ரேலியா அணி, முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய இங்கிலாந்து அணி, நிர்ணயிக்கப்பட்ட 20 ஓவர்கள் நிறைவில், 7 விக்கெட்டுகள் இழப்புக்கு 178 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, டாவிட் மாலன் 82 ஓட்டங்களையும் மொயின் அலி 44 ஓட்டங்களையும் பெற்றுக்கொண்டனர்.

அவுஸ்ரேலியக் கிரிக்கெட் அணியின் பந்துவீச்சில், ஸ்டொயினிஸ் 3 விக்கெட்டுகளையும் செம்பா 2 விக்கெட்டுகளையும் கம்மின்ஸ் மற்றும் ஸ்டார்க் ஆகியோர் தலா 1 விக்கெட்டினையும் வீழ்த்தினர்.

இதனைத்தொடர்ந்து 179 என்ற வெற்றி இலக்கை நோக்கி பதிலுக்கு களமிறங்கிய அவுஸ்ரேலிய அணியால், 20 ஓவர்கள் நிறைவில் 6 விக்கெட்டுகள் இழப்புக்கு 170 ஓட்டங்களை மட்டுமே பெற முடிந்தது. இதனால், இங்கிலாந்துக் கிரிக்கெட் அணி 8 ஓட்டங்கள் வித்தியாசத்தில் வெற்றிபெற்றது.

ஜோஸ் பட்லர் முழுநேர அணித்தலைவராக பொறுப்பேற்றதற்கு பிறகு அவரது தலைமையில் பெற்றுக்கொள்ளும் முதல் தொடர் வெற்றி இதுவாகும்.

இதன்போது அணியின் அதிகப்பட்ச ஓட்டங்களாக, மிட்செல் மார்ஷ் 45 ஓட்டங்களையும் டிம் டேவிட் 40 ஓட்டங்களையும் பெற்றுக்கொண்டனர்.

இங்கிலாந்துக் கிரிக்கெட் அணியின் பந்துவீச்சில், சேம் கர்ரன் 3 விக்கெட்டுகளையும் பென் ஸ்டோக்ஸ், டேவிட் வில்லி, ரீஸ் டொப்லே ஆகியோர் தலா 1 விக்கெட்டினை வீழ்த்தினர்.

இப்போட்டியின் ஆட்டநாயகனாக, 49 பந்துகளில் 4 சிக்ஸர்கள் 7 பவுண்ரிகள் அடங்களாக 82 ஓட்டங்களை பெற்றுக்கொண்ட டாவிட் மாலன் தெரிவுசெய்யப்பட்டார்.