இரண்டாவது ஒருநாள் போட்டியிலும் வெற்றி: இங்கிலாந்து அணிக்கெதிரான ஒருநாள் தொடரை வென்றது அவுஸ்ரேலியா!

இங்கிலாந்து அணிக்கெதிரான இரண்டாவது ஒருநாள் போட்டியில், அவுஸ்ரேலியக் கிரிக்கெட் அணி 72 ஓட்டங்கள் வித்தியாசத்தில் வெற்றிபெற்றது.

இந்த வெற்றியின் மூலம் மூன்று போட்டிகள் கொண்ட ஒருநாள் தொடரை, 2-0 என்ற கணக்கில் அவுஸ்ரேலியா அணி முன்னிலைப் பெற்றுள்ளதோடு, தொடரையும் வென்றுள்ளது.

சிட்னி மைதானத்தில் இன்று (சனிக்கிழமை) நடைபெற்ற இப்போட்டியில், அவுஸ்ரேலியக் கிரிக்கெட் அணியும் இங்கிலாந்து கிரிக்கெட் அணியும் மோதின.

இப்போட்டியில் நாணய சுழற்சியில் வெற்றிபெற்ற அவுஸ்ரேலிய அணி, முதலில் துடுப்பெடுத்தாட தீர்மானித்தது.

இதன்படி முதலில் துடுப்பெடுத்தாடிய அவுஸ்ரேலிய அணி, நிர்ணயிக்கப்பட்ட 50 ஓவர்கள் நிறைவில், 8 விக்கெட்டுகள் இழப்புக்கு 280 ஓட்டங்களை பெற்றுக்கொண்டது.

இதில் அணியின் அதிகப்பட்ச ஓட்டங்களாக, ஸ்டீவ் ஸ்மித் 94 ஓட்டங்களையும் மார்னஸ் லபுஸ்சேகன் 58 ஓட்டங்களையும் பெற்றுக்கொண்டனர்.

இங்கிலாந்துக் கிரிக்கெட் அணியின் பந்துவீச்சில், அடில் ராஷித் 3 விக்கெட்டுகளையும் கிறிஸ் வோக்ஸ் மற்றும் வில்லி ஆகியோர் தலா 2 விக்கெட்டுகளையும் மொயின் அலி 1 விக்கெட்டினையும் வீழ்த்தினர்.

இதனைத்தொடர்ந்து 281 என்ற வெற்றி இலக்கை நோக்கி பதிலுக்கு களமிறங்கிய இங்கிலாந்து அணி, 38.5 ஓவர்கள் நிறைவில் 208 ஓட்டங்களுக்கு சுருண்டது. இதனால், அவுஸ்ரேலியா அணி 72 ஓட்டங்கள் வித்தியாசத்தில் வெற்றிபெற்றது.

இதன்போது அணியின் அதிகப்பட்ச ஓட்டங்களாக, சேம் பிளிங்ஸ் 71 ஓட்டங்களையும் ஜேம்ஸ் வின்ஸ் 60 ஓட்டங்களையும் பெற்றுக்கொண்டனர்.

அவுஸ்ரேலிய அணியின் பந்துவீச்சில், மிட்செல் ஸ்டார்க் மற்றும் ஆடம் செம்பா ஆகியோர் தலா 4 விக்கெட்டுகளையும் ஜோஸ் ஹசில்வுட் 2 விக்கெட்டுகளையும் வீழ்த்தினர்.

இப்போட்டியின் ஆட்டநாயகனாக, பந்துவீச்சில் 4 விக்கெட்டுகளை வீழ்த்திய மிட்செல் ஸ்டார்க் தெரிவுசெய்யப்பட்டார்.