லங்கா பிரீமியர் லீக் ரி-20 தொடரின், இறுதிப் போட்டிக்கான இரண்டாவது தகுதிப் போட்டியில் வெற்றிபெற்று கொழும்பு ஸ்டார்ஸ் அணி, முதல்முறையாக இறுதிப் போட்டிக்கு முன்னேறியுள்ளது.
இதன்படி இன்று நடைபெறும் மகுடத்திற்கான இறுதிப் போட்டியில், கொழும்பு ஸ்டார்ஸ் அணி, , இரண்டு முறை சம்பியனான லைக்கா ஜப்னா கிங்ஸ் அணியை எதிர்கொள்ளவுள்ளது.
கொழும்பு- ஆர். பிரேமதாஸ மைதானத்தில் நேற்று (வியாழக்கிழமை) நடைபெற்ற இப்போட்டியில், கொழும்பு ஸ்டார்ஸ் அணியும் கண்டி பெல்கன்ஸ் அணியும் மோதின.
இப்போட்டியில், நாணய சுழற்சியில் வெற்றிபெற்ற கொழும்பு ஸ்டார்ஸ் அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய கண்டி பெல்கன்ஸ் அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட்டுகள் இழப்புக்கு 168 ஓட்டங்களை பெற்றுக்கொண்டது.
இதில் அணியின் அதிகப்பட்ச ஓட்டங்களாக, வனிந்து ஹசரங்க ஆட்டமிழக்காது 77 ஓட்டங்களையும் அஷேன் பண்டார 40 ஓட்டங்களையும் பெற்றுக்கொண்டனர்.
கொழும்பு ஸ்டார்ஸ் அணியின் பந்துவீச்சில், கசுன் ராஜித 4 விக்கெட்டுகளையும் டோமினிக் ட்ரேக்ஸ் மற்றும் நபி ஆகியோர் தலா 1 விக்கெட்டினையும் வீழ்த்தினர்.
இதனைத்தொடர்ந்து 169 என்ற வெற்றி இலக்கை நோக்கி பதிலுக்கு களமிறங்கிய கொழும்பு ஸ்டார்ஸ் அணி, 18.5 ஓவர்கள் நிறைவில் 4 விக்கெட்டுகள் இழப்புக்கு வெற்றி இலக்கை கடந்தது. இதனால், கொழும்பு ஸ்டார்ஸ் அணி, 6 விக்கெட்டுகளால் வெற்றிபெற்றது.
இதன்போது அணியின் அதிகப்பட்ச ஓட்டங்களாக, சரித் அசலங்க 64 ஓட்டங்களையும் ரவி பொபாரா ஆட்டமிழக்காது 29 ஓட்டங்களையும் பெற்றுக்கொண்டனர்.
கண்டி பெல்கன்ஸ் அணியின் பந்துவீச்சில், கமிந்து மெண்டிஸ் 2 விக்கெட்டுகளையும் கார்லோஸ் பிரத்வெயிட் 1 விக்கெட்டினையும் வீழ்த்தினர்.
இப்போட்டியின் ஆட்டநாயகனாக, கொழும்பு அணி சார்பில் 4 விக்கெட்டுகளை சாய்த்த கசுன் ராஜித தெரிவுசெய்யப்பட்டார்.
