தேர்தலை பிற்போடுவதற்கு அரசாங்கம் முன்னெடுக்கும் வேலைத்திட்டம் மீண்டும் மக்கள் போராட்டத்துக்கு வழிவகுக்கும் என 43ஆவது படையணியின் தலைவரும் நாடாளுமன்ற உறுப்பினருமான சம்பிக்க ரணவக்க தெரிவித்துள்ளார்.
கொழும்பில் அமைந்துள்ள 43ஆவது படையணி அலுவலகத்தில் நேற்று (புதன்கிழமை) இடம்பெற்ற ஊடகவியலாளர் சந்திப்பின் போதே அவர் இதனைத் தெரிவித்தார்.
தேர்தலை பிற்போவதற்கு 21 தடவைகள் முயற்சித்த அரசாங்கம், 22ஆவது தடவையில் நிதி அமைச்சின் செயலாளரையும் அச்சக பிரதானியையும் பயன்படுத்திக்கொண்டு பணம் வழங்காமல் தேர்தலை பிற்போவதற்கு நடவடிக்கை எடுத்துள்ளதாக அவர் குற்றஞ்சாட்டினார்.
மேலும், தேர்தலை பிற்போடுவதற்கு மேற்கொள்ளும் முயற்சிகள் மக்களின் இறையாண்மைக்கு விடுக்கப்படும் மரண அடியாகும் என அவர் தெரிவித்தார்.
பயங்கரவாத அச்சுறுத்தல், சுனாமி மற்றும் கொரோனா போன்ற இக்கட்டான நிலையில் இந்த நாட்டில் தேர்தல் இடம்பெற்றதை சுட்டிக்காட்டிய அவர், நாட்டின் தற்போதைய நிலைமையிலும் பணம் இல்லையென்றோ அல்லது வேறு காரணங்களை காட்டி தேர்தலை பிற்போட்டால் நிச்சயமாக மக்கள் போராட்டம் ஏற்பட்டு முன்னாள் ஜனாதிபதி கோட்டாபய ராஜபக்ஷயை விரட்டியடித்ததைப்போன்ற செயற்பாடுக்கு வழிவகுக்கும் என குறிப்பிட்டார்.
