“என்னை முதல் முறை பார்த்தபோது எனது கணவர் வித்யாசாகர் எனக்கு ஒரு பை நிறைய சொக்லேட்டுகளைப் பரிசாக வழங்கினார்” என நடிகை மீனா தெரிவித்துள்ளார்.
குழந்தை நட்சத்திரமாக அறிமுகமாகி பின்னர் முன்னணி நடிகர்களுடன் இணைந்து நடித்து ரசிகர்களின் மனதில் இடம் பிடித்தவர் மீனா. இவர் அண்மையில் ஊடகமொன்றுக்கு வழங்கிய செவ்வியொன்றிலேயே மேற்கண்டவாறு தெரிவித்துள்ளார்.
இது குறித்து அவர் மேலும் தெரிவிக்கையில் ”நான் கடந்த 2009 ஆம் ஆண்டு ஜூலை மாதம் 12ஆம் திகதி எனது பெற்றோர்கள் பார்த்த மாப்பிள்ளையான வித்யாசாகரைத் திருமணம் செய்து கொண்டேன்.
ஆரம்பத்தில் எங்கள் இருவரது ஜாதகத்தையும் பார்த்தவர் இந்த வரனை விட நல்ல வரன் அமையும் எனக் கூறினார். இதனால் உடனே வித்தியாசாகர் வேண்டாம் எனக் கூறிவிட்டேன் . அதன் பின்னர் எனது அத்தைதான் என்னை திருமணத்திற்கு சம்மதிக்க வைத்தார்.
அவரை நான் முதல் முதலாகப் பார்த்த போது ஒரு பை நிறைய சொக்லேட்டுகளை வாங்கிவந்து என்னிடம் கொடுத்தார். எனக்கு சொக்லேட்டுகள் என்றால் மிகவும் பிடிக்கும் என்பதை அறிந்தே அவர் இவ்வாறு செய்தார்.இது என்னை மிகவும் கவர்ந்தது” இவ்வாறு தெரிவித்துள்ளார்.
வித்யாசாகர் கடந்த வருடம் நுரையீரல் கோளாறினால் பாதிக்கப்பட்டு சிகிச்சை பெற்றுவந்த நிலையில் உயிரிழந்தார் என்பது குறிப்பிடத்தக்கது.
