ஆப்கானிஸ்தான் அணிக்கு எதிரான ஒரேயொரு டெஸ்ட் போட்டியில் இலங்கை அணி 10 விக்கெட்களால் வெற்றிபெற்று டெஸ்ட் தொடரையும் கைப்பற்றியுள்ளது.
கடந்த 2ஆம் திகதி கொழும்பு- எஸ்.எஸ்.சி. மைதானத்தில் ஆரம்பமான இப்போட்டியில், நாணய சுழற்சியில் வெற்றிபெற்ற இலங்கை அணி, முதலில் களத்தடுப்பை தீர்மானித்தது.
இதன்படி முதலில் துடுப்பெடுத்தாடிய ஆப்கானிஸ்தான் அணி, முதல் இன்னிங்ஸிற்காக 198 ஓட்டங்களை பெற்றுக்கொண்டது. அவ்வணி சார்பாக ரஹ்மத் ஷா அதிகபட்சமாக 91 ஓட்டங்களை பெற்றுக்கொடுக்க பந்துவீச்சில் இலங்கை அணி சார்பாக விஸ்வ பெர்னாண்டோ 4 விக்கெட்களை சாய்த்தார்.
இதனைத்தொடர்ந்து பதிலுக்கு முதல் இன்னிங்சில் விளையாடிய இலங்கை அணி, 439 ஓட்டங்களை பெற்றுக்கொண்டது. இலங்கை அணி சார்பாக மெத்தியூஸ் 141 ஓட்டங்களையும் சந்திமால் 107 ஓட்டங்களையும் பெற்றுக்கொடுக்க பந்துவீச்சில் நவீத் சத்ரான் 4 விக்கெட்களை வீழ்த்தினார்.
இதனையடுத்து, 241 ஓட்டங்கள் பின்னிலையில் தனது இரண்டாவது இன்னிங்சை தொடங்கிய ஆப்கான் அணி 296 ஓட்டங்களுக்குள் சுருண்டது. ஆப்கானிஸ்தான் அணி சார்பாக ஆரமப துடுப்பாட்ட வீரரான இப்ராஹிம் சத்ரான் 114 ஓட்டங்களை பெற பந்துவீச்சில் பிரபாத் ஜெயசூரிய 5 விக்கெட்களை கைப்பற்றினார்.
இதனை தொடந்து 56 ஓட்டங்களை எடுத்தால் வெற்றி என்ற இலக்கோடு பதிலுக்கு தனது இரண்டாவது இன்னிங்ஸை தொடங்கிய இலங்கை அணி எவ்வித விக்கெட் இழப்பும் இன்றி வெற்றி இலக்கை கடந்தது.
இலங்கை அணி சார்பாக ஆரம்ப துடுப்பாட்ட வீரர்களான திமுத் கருணாரத்ன 32 ஓட்டங்களை நிஷான் மதுஷக 22 ஓட்டங்களை ஆட்டமிழக்காமல் பெற்றுக்கொடுத்தனர்.
